16 iyun 2017-ci il tarixində Sumqayıtda yerləşən Gilan Tekstil Parkına "ASAN Xidmət"in könüllülərinin səfəri təşkil olunub.
Xeberle.com-un "APA-Economics”ə istinadən məlumatına görə, əvvəlcə "ASAN Xidmət"in könüllülərinə təhlükəsizliklə bağlı təlimatlar, daha sonra isə müəssisə haqqında geniş məlumat verilib.
Bildirilib ki, 2012-ci ildən fəaliyyətə başlayan Tekstil Parkı İplik, Toxuma, Hörgü, Boya, Tikiş Fabriklərindən və Hazır Məhsul anbarından ibarətdir. Gilan Tekstil Parkında yüksək keyfiyyətli Azərbaycan pambığından dünya standartlarına cavab verən tekstil məhsulları istehsal edilir. Burada istehsal olunan məhsullar əsasən Ukrayna və Belarusa ixrac olunur.
Gilan Tekstil Parkının İnsan resursları üzrə aparıcı mütəxəssisi Rəna Nəzərova deyib ki, "Giltex" Gilan Tekstil Parkının brend nişanıdır: "Bizim fabrikdə Azərbaycan pambığından dünya standartlarına cavab verən keyfiyyətli məhsullar hazırlanır. Məhsul istehsal edilərkən heç bir kimyəvi maddələrdən istifadə olunmur, insan sağlamlığına heç bir zərər dəymir”.
R.Nəzərova əlavə edib ki, təmsil olunduğu müəssisə daim gənc kadrları işə cəlb edir. Onun sözlərinə görə, bu məqsədlə Gilan Tekstil Parkı təhsil müəssisələri və gənclər komitələri ilə sıx əlaqə saxlayır: "Təkcə yay mövsümündə deyil, il boyu gənclər bizdə təcrübə proqramı keçir. Gənc kadrları işə cəlb edərək, onlardan aparıcı mütəxəssislər yetişdiririk".
Daha sonra "ASAN Xidmət"in könüllüləri Tekstil Parkının istehsalat sahələrini gəzib və burada müxtəlif növ parça, yataq dəstləri, yorğanlar, yastıqlar, habelə müxtəlif təyinatlı, oda və suya davamlı uniformalar, hərbi və xəstəxana geyimləri, xalatlar, hotellər üçün dəsmalların istehsalı, tikilişi ilə yaxından tanış olublar.
1 saylı "ASAN Xidmət"in könüllüsü Humay Əfəndili bildirib ki, məişətdə istifadə olunan məhsulların istehsal prosesi ilə tanışlıq gənclər üçün yeni təcrübə deməkdir: "Bizə şərait yaradıb bura gətirdikləri üçün "ASAN Xidmət" və "Gilan Holding"in təşkilatçılarına təşəkkür edirəm. Gündəlik istifadə etdiyimiz əşyaların necə hazırlanması prosesini görmək bizim üçün yeni təcrübədir. "Gilan Holding" mütəxəssisləri bütün istehsalat prosesi ilə bizi tanış etdi. Biz bütün proseslər ilə yaxından tanış olduq, hər şeyin necə mükəmməl, son texnologiyalarla hazırlandığının şahidi olduq. Bizim üçün qürurvericidir ki, Azərbaycanda belə bir holdinq var".
3 saylı "ASAN Xidmət"in könüllüsü Elşən Şirbağırov bu səfər zamanı maraqlı məlumatlar əldə etdiyini qeyd edib: "Mən bu gün öyrəndim ki, İslam və Avropa Oyunlarındakı ümumi geyimləri bu fabrik istehsal edib. Bundan başqa, mən burada geyim dəstlərinin, istifadə etdiyimiz əşyaların xanımlar tərəfindən tikildiyinin şahidi oldum”.
Sumqayıt Regional "ASAN Xidmət" Mərkəzinin nümayəndəsi Tofiq Adıgözəlov da bu səfərin onlar üçün əhəmiyyətindən danışıb: "Əvvəllər Azərbaycanda belə istehsalat birliyinin olduğunu bilmirdim. Bura gəlib hər şeyin, ilk öncə xammalın pambıqdan başladığını gördüm. Həqiqətən inandım ki, "Gilan Tekstil" Azərbaycanda yeganə istehsalat birliyidir ki, hər məhsulu tam pambıqdan hazırlayır"
Xəbərdən istifadə edərkən istinad etmək vacibdir.
