"Avqustun 1-dən 2017-2018-ci tədris ili üzrə ilk peşə-ixtisas təhsili müəssisələrinə şagird qəbulu "ASAN peşə” layihəsi çərçivəsində həyata keçiriləcək".
Xeberle.com-un xəbərinə görə, bunu Təhsil Nazirliyinin İctimaiyyətlə əlaqələr sektorunun müdiri Cəsarət Valehov bildirib.
Onun sözlərinə görə, dövlət ilk peşə-ixtisas təhsili müəssisələrinə sənəd qəbulu avqustun 22-də bitəcək: "Sənədlər "ASAN xidmət” mərkəzlərində və müvafiq təhsil müəssisələrində sənəd qəbulu komissiyaları tərəfindən qəbul ediləcək. Ərizə qəbulu üçün şəxsiyyəti təsdiq edən sənəd və təhsil haqqında sənəd təqdim edilməlidir. Bakı, Gəncə və Sumqayıt şəhərləri, Bərdə, Masallı, Sabirabad və Qəbələ rayonları üzrə ilk peşə-ixtisas təhsili müəssisələrinə şagird qəbulu üçün müsabiqədə iştirak edənlərin qeydiyyatı yalnız müvafiq "ASAN xidmət” mərkəzləri tərəfindən aparılır. Ödənişli əsaslarla şagird qəbulu üzrə qeydiyyat Bakı və Gəncə şəhərlərində yerləşən ilk peşə-ixtisas təhsili müəssisələri istisna olmaqla müvafiq təhsil müəssisələri tərəfindən həyata keçirilir".
C.Valehov deyib ki, dövlət təhsilalanların ilk peşə-ixtisas təhsili pilləsində yalnız bir dəfə pulsuz təhsil almaq hüququnu təmin edir: "Əcnəbilər və vətəndaşlığı olmayan şəxslər dövlət ilk peşə-ixtisas təhsili müəssisələrində yalnız ödənişli əsaslarla təhsil ala bilir. İlk peşə-ixtisas təhsili müəssisələrinə qəbul olmaq üçün sənəd verən şəxslər 10 ixtisas seçmək hüququna malikdir. Şagird qəbulu şəhadətnamə və attestat üzrə müvafiq fənlərin orta balı nəzərə alınmaqla həyata keçirilir. Sənəd qəbulu komissiyalarında sənəd verənlərin sərbəst seçimi əsasında ilk peşə-ixtisas təhsili müəssisələri və onların ixtisası müəyyən edilir, istədikləri ardıcılıqla təsdiqlənir".
"Bu müəssisələrdə təhsil müddəti 6 aylıq, 1 illik, 2 illik və 3 illik təhsil proqramları əsasında təşkil olunur. Təhsil müddəti 3 illik olan proqramlar üzrə seçimdə yalnız son 2 ildə ümumi orta təhsil səviyyəsini bitirən və orta təhsil almaq istəyən şəxslər iştirak edə bilər. Ümumi orta təhsil səviyyəsini bitirənlər təhsil müddəti 1 (nəqliyyat vasitələrinin idarə olunması ilə bağlı ixtisaslar istisna olmaqla) və ya 2 illik proqramlar üzrə də seçimdə iştirak edə bilər. Orta, orta-ixtisas və ali təhsili olanlar təhsil müddəti 6 ay və 1 il olan proqramlar üzrə seçim prosesində iştirak edə bilərlər", - o əlavə edib.
Qeyd edək ki, ötən il Bakı və Gəncə şəhərlərində pilot olaraq həyata keçirilən "ASAN peşə” layihəsi üzrə 4000-ə yaxın şəxs ilk peşə-ixtisas təhsili müəssisələrinə qəbul olub.
Xəbərdən istifadə edərkən istinad etmək vacibdir.
