Azərbaycan Prezidentinin rəsmi səhifəsi - president.az saytından ölkə başçısının verdiyi fərman və sərəncamlar, görüşlər, səfərlər, qəbullar, qəbul edilən sənədlərlə yanaşı, Azərbaycanda baş verən yeniliklərlə də tanış ola bilərik. Hətta saytdakı  "Prezidentə məktub yazmaq” bölməsindən ölkə başçısına məktub yazmaq da mümkündür. Odur ki, vətəndaşlar mütəmadi olaraq öz istək və arzularını ölkə prezidentinə elektron qaydada bildirirlər.
Prezidentin rəsmi saytında yerləşdirilən məktublarda Prezident İlham Əliyevin Sumqayıta olan diqqət və qayğısından, şəhərimizin gündən-günə gözəlləşməsindən, şəhərdə həyata keçirilən abadlıq-quruculuq işlərindən razılıq ifadə olunur.
Xəbərlə.com saytı olaraq, son aylarda Sumqayıt sakinləri tərəfindən yazılan bir neçə məktubu təqdim edirik:
- Murad Ağamiyevdən:
Hörmətli cənab Prezident,
Sizin uzaqgörən və məqsədyönlü siyasətiniz nəticəsində bu gün Azərbaycan, sözün əsl mənasında, dünyada xüsusi nüfuzu olan dövlətə çevrilib. Qədirbilən Azərbaycan xalqı Sizi dəstəkləyir və bundan sonra da uğurlu fəaliyyətinizin davamlı olmasını arzu edir.
Əminik ki, ölkəmizi nüfuzdan salmaq istəyən qara qüvvələrin və anti-Azərbaycan ünsürlərin bütün cəhdləri hər zaman olduğunu kimi, bu dəfə də iflasa uğrayacaq. Sizə qarşı hesablanmış və tərtib edilmiş qarayaxma kampaniyaları heç bir vəchlə tərəfimizdən qəbul edilmir və edilməyəcəkdir. Son günlər dünya mediasında aparılan qara piyar Azərbaycan xalqının və dost xalqların ciddi hiddətinə səbəb olub. Əmin olun ki, biz hər zaman olduğu kimi, bu gün də Sizi və alternativi olmayan hakimiyyətinizi dəstəkləyirik.
- Seva Əmrahovadan:
Hörmətli cənab Prezident,
Azərbaycan gündən-günə çiçəklənir. Sizin kimi rəhbəri olan bir ölkədə yaşadığım üçün fəxr edirəm. Ölkəmizdə sülh və sabitliyi qoruyub saxladığınıza, bizə dünyəvi və firavan ölkədə yaşamaq imkanı yaratdığınıza görə Sizə təşəkkürümü bildirirəm.
Biz gələcəyə cəsarətlə baxırıq. Ona görə ki, ölkəmizin Prezidenti müdrik, ağıllı siyasətçi və əsl vətənpərvərdir. Xoşbəxt yaşamağımız üçün etdiyiniz hər şeyə görə Sizə bir daha minnətdarlığımı bildirirəm.
- İndira Şəmsivaridən:
Möhtərəm cənab Prezident,
Sizi çox sevirik! Allah Sizi qorusun! Media nümayəndələrinə bağışladığınız o evləri görəndə, orada yaşayacaq insanların sevincini izləyəndə, dostlarla paylaşanda kövrəldim. Mənzil almağın sevinc hissini yaşamağın nə olduğunu yaxşı bilən bir insan kimi Tanrıma dua etdim ki, Siz daim sağlam və güclü olasınız ki, dünyanın bu böhranlı vaxtında, bax beləcə, atasına layiq oğul kimi, xalqınıza daim xidmət edəsiniz.
Əziz Prezidentimiz, Siz dünyada qüdrətli dövlətlərin öz vətəndaşına edə bilmədiyi xeyirxah işləri xalqınıza edirsiniz. Allah Sizi və sevdiklərinizi qorusun! Qəlbim fəxarətlə doludur. Bilirəm ki, Sizin kimi lideri Tanrı da sevir. Uca Yaradan Sizə yardımçı olsun!
Mən Açıq hökumətin təşviqi Milli Fəaliyyət Proqramı çərçivəsində bütün regionlarda çıxış edərək, Sizin xalqımıza göstərdiyiniz böyük və fədakar xidmətlərdən danışıram. Sizin öz xalqınızın həyatını asanlaşdırmaq üçün atdığınız qətiyyətli addımlardan söz açır, bölgələrdə bu Proqramdan sadə əhalinin necə faydalanmasını başa salırıq.
Tanrıya Heydər Əliyevi, Sizi bizə bəxş etdiyi üçün dualar edirik. Siz bütün dünya azərbaycanlılarının Prezidenti olduğunuzu sübut etmisiniz. Övladınız Heydər İlham oğlu Əliyevi də özünüz kimi, millətimizə xeyirli bir övlad kimi böyütmüsünüz. Allah Sizi qorusun!
- Ləman Ağayevadan:
Salam cənab Prezident,
Milli Mətbuatımızın 142 illiyi münasibətilə daha 255 jurnalist ailəsinə sevincli anlar yaşatdınız. İnsanları, sözün həqiqi mənasında, xoşbəxt etdiniz. Dünyanın heç bir ölkəsində, həm də qlobal böhranlar dövründə jurnalistlər bu qədər diqqət və qayğı ilə əhatələnməyib. Həmin sevincdən bizim ailəyə də pay düşdü. Anam Aida Eyvazovanın 35 illik jurnalist fəaliyyətini dəyərləndirdiniz. Ailəmizə yaşatdığınız bu sevincə görə doğmalarım və dostlarım adından Sizə dərin minnətdarlığımı bildirirəm və əminəm ki, o mənzillərdən hər zaman sevinc-şadlıq səsi gələcək. Sizi hər zaman dəstəkləyir və sevirik. Tanrı Sizi qorusun!
- Bəhruz İsmayılov və İlyas Süleymanovdan:
Hörmətli cənab Prezident,
Məcburi köçkünlərə göstərilən diqqət və qayğıya görə Sizə təşəkkürümüzü bildiririk. Qısa müddət ərzində Cəbrayıl rayonunun Cocuq Mərcanlı kəndində görülmüş işlər biz qubadlılıları da çox sevindirir. Böyük qayıdışın təməl daşı olan Cocuq Mərcanlıya qayıdış planı vaxt gələcək Qubadlıda və işğaldan azad olunacaq digər rayonlarımızda tətbiq ediləcəkdir. 
Cənab Prezident, bizdə bu inamı yaradan Sizin qətiyyətli siyasətinizdir. Tanrı Sizi qorusun.
- Zöhrab Süleymandan:
Hörmətli cənab Prezident,
Ötən ay dünyanın, o cümlədən Qafqazın ən yaxşı kampuslarından biri olan Bakı Ali Neft Məktəbinin yeni və əzəmətli kampusu Sizin iştirakınızla istifadəyə verildi. Bu hadisə Ali Neft Məktəbinin bir əməkdaşı olaraq mənim, professor-müəllim heyətinin, həmçinin tələbələrin böyük sevincinə səbəb oldu. Hər birimiz qürur duyuruq ki, dünyanın aparıcı  universitet kampusları ilə müqayisə oluna biləcək müasir tipli böyük bir şəhərciyimiz var.
Sizin "Biz neft kapitalını insan kapitalına çevirməliyik” şüarınız bu gün öz təsdiqini tapmaqdadır. Bakı Ali Neft Məktəbinin işçi heyəti Sizin  etimadınızı layiqincə doğrultmağı öz fəaliyyətinin əsas prioriteti hesab edir. Ölkəmizə ləyaqətli və vətənpərvər gənclər yetişdirmək əsas amalımız və məqsədimizdir. Çox sağ olun ki, bu şərəfli yolda bizimləsiniz. Biz də Vətənimizə və Sizə hər zaman sadiq olacağıq.
- Xuraman Məhərrəmovadan:
Hörmətli cənab Prezident,
Son illər görülən işlər sayəsində doğma şəhərimiz Sumqayıtın siması yenilənir, əhalinin rifah halı yaxşılaşır. Yeni tikilən və əsaslı təmir olunan ictimai-sosial binalar, parklar, dənizkənarı bulvar və digər obyektlər şəhərimizin ümumi mənzərəsini gözəlləşdirir, eyni zamanda, insanların firavan və rahat yaşayışının təmin olunmasına xidmət edir.
Cənab Prezident, şəhərimizə göstərdiyiniz diqqət və qayğıya görə Sizə dərin təşəkkürümü bildirir, ali-dövləti fəaliyyətinizdə uğurlar, uzun ömür, möhkəm cansağlığı arzulayıram.
Xeberle.com

Xəbərdən istifadə edərkən istinad etmək vacibdir.