Baş Dövlət Yol Polisi İdarəsi sürücülərə yağmurlu hava şəraiti ilə bağlı xəbərdarlıq edib.
Xeberle.com xəbər verir ki, idarədən avtosfer.az-a verilən məlumata görə, Ekologiya və Təbii Sərvətlər Nazirliyi yaxın bir neçə gündə havaların yağmurlu keçəcəyini bildirib.
Bunu nəzərə alaraq, DYP sürücülər bir neçə məqama xüsusi diqqət yetirməli olduğunu tövsiyə edir. İlk növbədə avtomobilin şüşəsilənləri, işıq cihazları saz vəziyyətdə olmalıdır. Bundan əlavə, yollarda sürət rejimi yolun vəziyyətinə uyğun seçilməlidir. Yəni, 110 km/saat sürət rejimi nişanı qoyulubsa sürücü mütləq bu sürətlə avtomobili idarə etməməlidir. Yol hərəkəti qaydalarında və qanunvericilikdə də qeyd edildiyi kimi, sürücü yol və meteoroloji şəraitə uyğun sürət rejimi seçməlidir. Belə havada avtomobilin təkərlərinə xüsusi diqqət yetirilməlidir: "Əksər yerlərdə yolun səthi islanıb. Bu vəziyyət çox ciddi bir təhlükəni gizlədir. Uzun müddət quraqlıqdan sonra yağan çiskin asfalt üstündəki tozu isladır və çox sürüşkən bir təbəqə əmələ gəlir. Bu təbəqənin sürüşkənliyi bəzən qardakı kimi ola bilər. Nə qədər ki, gur yağış yağaraq, o sürüşkən təbəqəni yoldan yumayıb, diqqətli olun, sərt manevr etməyin, sürəti aşağı salın, ara məsafəsini bir az da artırın”.

Xəbərdən istifadə edərkən istinad etmək vacibdir.