Müsahibimiz deyir ki, yanğınsöndürmə işi kənardan asan görünsə də, əslində hamının bacara biləcəyi iş deyil. Bu peşə dözümlülük və iradə tələb edir. Biz sözlə, bu iş təkcə məsuliyyətli deyil, həm də təhlükəlidir. Özlərini odun-alovun içinə atan yanğınsöndürənlər hər an təhlükə ilə üz-üzə qalırlar. Amma bu təhlükə də nəzərə alınıb. Onların həyatını dövlət sığortalayıb. Bədbəxt hadisə baş verərsə yanğınsöndürənlər pulsuz müalicə olunur və müavinət alırlar. Günün 24 saatını çalışan yanğınsöndürənlər insanları yaranan fövqəladə hadisələrdən xilas edirlər. Hər gün təlimatlandırılır, hazır vəziyyətdə  olurlar. İnzibati əraziyə gün ərzində 1000-1200 həyəcan siqnalı gəlir ki, bütün bu proseslər də "101” idarəetmə mərkəzindən tənzimlənir. Yanğınsöndürmə qüvvələrinin idarəetmə mərkəzində qeydiyyat xəritəsi quraşdırılıb. Bu xəritə vasitəsilə hər hansı bir qəza və ya yanğın hadisəsini müşahidə etmək mümkündür. Yanğınsöndürənlər bəzən sakinlərin narazılıqları ilə də rastlaşırlar. Bu da əsasən gecikmələrlə bağlı olur.  Onlar təkcə alovun qarşısını almırlar, həm də xilasetmə işlərini həyata keçirirlər. Bunun üçün respublikanın magistral yollarının kənarında yanğın depoları yaradılıb. Ümummilli lider Heydər Əliyevin sərəncamı ilə 2002-ci ildən oktyabrın 10-u yanğınsöndürənlərin peşə bayramı kimi qeyd olunur. O gündən bu günə qədər xeyli yol qət edən yanğınsöndürmə xidmətinin fəaliyyəti bütün ölkəni əhatə edir. Bu gün peşə bayramlarını qeyd edən yanğınsöndürənlər elə bayramlarını da iş başında keçirirlər.