Xəstəliyimdən möhlət istəyirəm. Səhnədən artıq əlimi üzmüşəm. Ancaq ata olaraq arzularım var. Oğlumun toyunu görmək istəyirəm.
Bu sözləri ağır xəstəlikdən əziyyət çəkən xalq artisti Fuad Poladov "Şərq” qəzetinə verdiyi müsahibəsində qeyd edib.
Sevilən aktyor bildirib ki, artıq xəstəliyini sevməyə başlayıb:
"Bilirəm, bu elə xəstəlikdi ki, məndən bir də əl çəkməz. Sadəcə bir az xərçəngdən möhlət istəyirəm. Həqiqətən möhlət istəyirəm ki, bəzi işləri başa çatdıra bilim. Düzdü, səhnədən artıq əlimi üzmüşəm. Artıq heç vaxt səhnədə olmayacağımı qəbul etmişəm. Bilirəm ki, mənim ora bir daha qayıdışım olmayacaq. Amma şəxsi həyatımda çatdırmaq istədiklərim var.
Duyğusal görünmək istəməmişəm heç vaxt. Amma deyəsən, bu xəstəlik məni bir az da duyğusal edə bildi. Ata olaraq arzularım var. İki övladım var. Qızım ailə qurub. Amma oğlumu evləndirməmişəm. 28 yaşı var. Oğlumun toyunu görmək, onu yerbəyer etmək istəyirəm. Buna görə xəstəliyimdən möhlət istəyirəm.
Çox istərdim ki, oğlumdan da arxayın olum, bilim ki, ailə sahibidi. Bu məni sakit edə bilər. Bir ata kimi oğul toyunu görmək arzum var. Buna görə Allahımdan da, xəstəliyimdən də möhlət istəyirəm”.
Qeyd edək ki, xalq artisti Fuad Poladov onkoloji xəstəlikdən əziyyət çəkir. Aktyorun səs tellərində problem yaranıb, qırtlağında şiş olduğu bildirilir. Hazırda aktyor evdə müalicə alır. (Kult.az)

Xəbərdən istifadə edərkən istinad etmək vacibdir.