Burada yiyəsini gözləyən hazır qəbirlər çoxdur. İnsanların bəziləri ailə üzvlərinin sayını nəzərə alaraq böyük bir ərazini hasarlayır. Elə buna görə də əksər hallarda qəbiristanlıqlarda yer qıtlığı yaranır. Dövlət rüsumu 63 manat olan qəbir yerlərinin ölü yiyələrinə təxmini neçəyə verilməsindən çoxu xəbərdardır. Bu qiymət adətən yerinə görə dəyişir. Qəbir yerlərinin əvvəlcədən alınmasına gəlincə, Bakı Şəhər Mənzil Komunal Təsərrüfatı Departamentinin Əhaliyə Vətəndaşlıq Xidməti Trestinindən bildirildi ki, bu illər əvvəl belə idi. Qəbir yerlərinin əvvəlcədən alınması İslam dininə görə də günah sayılır. Üstəlik qəbir yerinə görə əlavə pulun alınması da haram hesab olunur. Dindarlar bildirir ki, qəbirlərin mərmər daşlarla bəzədilməsi də günahdır. İslam dininə görə, müəyyən vaxtdan sonra qəbirlər torpağa qarışmalıdır. Ümumiyyətlə isə yer kürəsi insanların yaşaması və orada dəfn olunması üçün tanrının bir hədiyyəsidir. Hədiyyəni isə satın almazlar.