Yevlax rayonunda baş tutan 13 yaşlı bəylə 14 yaşlı gəlinin toy mərasimi ciddi müzakirələrə səbəb olub. Evləndirilən qaraçı cütlük üçün keçirilən toy və bununla bağlı sosial şəbəkələrdə yayılan fotolar birmənalı qarşılanmayıb.
Uzun müddət əvvəl baş verdiyi müəyyən edilən toy Mətbuat.az saytının yaydığı xəbərlə gündəm olub. Məsələyə də elə bundan sonra rəsmi qurumlar qarışıb. Fotosu yayılan cütlüyün yaşları bildirilsə də, onların ad və soyadları məlum deyil. Fotodan da göründüyü kimi, baş tutan toy yay vaxtına təsadüf edib.
Dəfələrlə erkən evliliyə qarşı mübarizə aparan və bununla bağlı maarifləndirici tədbirlər həyata keçirən Ailə, Qadın və Uşaq Problemləri üzrə Dövlət Komitəsi məsələnin araşdırılması üçün Yevlax rayon İcra Hakimiyyətinə müraciət edib. Ailə, Qadın və Uşaq Problemləri üzrə Dövlət Komitəsinin Hüquqi təminat şöbəsinin baş məsləhətçisi Rahil Süleymanzadənin Trend-ə bildirib ki, xəbər yayılan kimi araşdırma başladılıb:
"Yevlax rayon İcra Hakimiyyətindəki Gender zorakılığı və uşaqlara qarşı zorakılıq üzrə monitorinq qrupuna məktub göndərilib. Onlar bu barədə araşdırma aparıb bizə ətraflı məlumat verəcəklər”.
Məsələyə Daxili İşlər Nazirliyi də münasibət bildirib. Mətbuat.az saytına açıqlama verən DİN Mətbuat Xidmətinin KİV və İctimaiyyətlə əlaqələr şöbəsinin rəisi, polis polkovnik-leytenant İlham Babayev bildirib ki, yayılan məlumatlar həqiqəti əks etdirmir:
"Noyabrın 27-də bir sıra xəbər saytlarında və sosial şəbəkələrdə Yevlax şəhərində yaşayan 13 yaşlı oğlan və 14 yaşlı qızın guya ailə qurmaları barədə yayılan informasiyanın heç bir əsası yoxdur və həqiqəti əks etdirmir”.
İ.Babayevin sözlərinə görə, həmin informasiyanın dəqiqləşdirilməsi məqsədi ilə Yevlax Rayon Polis Şöbəsinin əməkdaşları tərəfindən müvafiq araşdırmalar aparılıb, lakin qeyd olunan məlumat öz təstiqini tapmayıb.
DİN rəsmisi bildirib ki, ölkə üzrə belə halların aradan qaldırılmasına dair hüquqi maarifləndirmə tədbirləri aparılır:
"Respublikamızın bütün bölgələrində olduğu kimi, Yevlaxda da ictimaiyyət arasında, orta məktəblərdə, əmək kollektivlərində vaxtaşırı keçirilən görüşlərdə belə hallara qarşı tədbirlər görülür, maarifləndirmə işləri aparılır. Qeyd olunan yazıya əlavə edilmiş foto isə nəinki Yevlaxda, ümumiyyətlə, Azərbaycanda çəkilməyib. Fotonun xarici dövlətlərdən birində çəkilməsinə dair müəyyən məlumatlar var”.(Axar.az)

Xəbərdən istifadə edərkən istinad etmək vacibdir.