Artıq 2017-ci ilin bitməsinə
sayılı günlər qalıb. Ötüb keçən bu il kimlərinsə yaddaşında xoş xatirələrlə,
kimlər üçünsə xoşagəlməz, bədbəxt hadisələrlə qaldı. Bəziləri bu dünyanı, bəziləri
isə vəzifəsini tərk etdi.
Bəs
görəsən sumqayıtlılar bu il hansı görkəmli nümayəndələrini itirdi?
Xeberle.com olaraq 2017-ci il ərzində dünyasını dəyişən və Sumqayıtımız üçün ağır itki
sayılan şəxsləri araşdırdıq.
Fevral ayında Sumqayıt şəhər 2 saylı xəstəxananın baş həkimi Vilayətdin Gözəlov infarkt keçirərək
dünyasını dəyişdi. Uzun illərdir ki, tibb sahəsində fəaliyyət göstərən V.Gözəlovun
qəfil ölümü sumqayıtlıların yaddaşında kədərli bir hadisə kimi qaldı.
Elə həmin ay bir üzücü
xəbər də sumqayıtlılar üçün gözlənilməz oldu. Kempo Karate üzrə 5-ci dan qara kəmər
ustası, Əməkdar məşqçi Rövşən Veysəlov evdə baş verən qaz sızması nəticəsində dünyasını dəyişdi.
İdman camiəsi bu xəbərin
şokundan ayılmamış daha bir hadisəyə sarsıldı.
Belə ki, cüdo idman
növü üzrə müəllim kimi fəaliyyət göstərən Sabir
Adıgözəlov 58 yaşında özünü məktəbin həyətindən asaraq intihar etdi.
Ədəbiyyat camiəsi üçün
də bu il itkisiz ötüşmədi. Azərbaycan ədəbiyyatının tanınmış simalarından olan
şair Sabir Sarvan 61 yaşında vəfat etdi.
Sumqayıt şəhər Maliyyə
İdarəsinin baş məsləhətçisi Oqtay Məmmədov 59 yaşında qəflətən dünyasını dəyişdi.
Fövqəladə Hallar
Nazirliyi Sumqayıt Regional Mərkəzinin xilasedicisi Ruslan Məmmədov isə Sumqayıtda xidməti vəzifəsini yetirərkən 37 yaşında bədbəxt
hadisə nəticəsində həlak oldu.
Qocaman şair və
jurnalist, Azərbaycan Yazıçılar Birliyinin və Azərbaycan Jurnalistlər
Birliyinin üzvü Xasay Cahangirov uzun sürən xəstəlikdən sonra 87 yaşında
bu dünyaya əlvida dedi.
"Şöhrət” ordenli
pedaqoq, Sumqayıt təhsilində verdiyi töhfələrlə iz buraxmış Minarə Tahirova 81 yaşında işıqlı
dünyanı tərk etdi.
Saytımız adından
dünyasını dəyişənlərə Allahdan rəhmət diləyir, yaxınlarına səbir arzulayırıq.
Xeberle.com olaraq 2017-ci ildə həyatını itirənlərlə
yanaşı, "kreslo”sunu itirənləri də araşdırdıq.
Sumqayıt şəhər Səhiyyə
şöbəsinin müdiri Ələkbər Tağıyev postuyla vidalaşmalı oldu. Onun yerinə isə, Nəriman Baxşəliyev təyin olundu.
Sumqayıt şəhər İcra
başçısının müavini, sosial-iqtisadi inkişafın təhlili və proqnozlaşdırılması
şöbəsinin müdiri Lalə Hacıyeva tutduğu
vəzifədən azad olunaraq H.Zeynalabdin qəsəbəsinin
icra nümayəndəsi vəzifəsinə təyin olundu.
Məlumat üçün qeyd edək
ki, icra başçısının müavini postuna indiyədək təyinat olmayıb.
Uzun illər
H.Zeynalabdin qəsəbəsinin icra nümayəndəsi vəzifəsində saç ağartmış Nasir
Rzayev də postunu itirənlərdəndir.
Sumqayıt Mənzil
Kommunal Təsərrüfat İstehsalat Birliyinin rəisi Rahim Mustafayevə də bu il düşərli olmadı. R. Mustafayev vəzifəsiylə vidalaşmalı oldu.
Sumqayıt Psixiatriya xəstəxanasının
rəhbərlik edən baş həkim Mail Tağıyev də kreslosunu tərk edənlər
sırasındadır.
Bununla yanaşı, məktəb
direktorlarından rəhbərliyə əlvida deyənlər
var.
Sumqayıt şəhər 8,9,
12 saylı tam orta məktəblərin direktorları Vəkil İbrahimov, Bəhruz Səlimxanov,
Mətanət Abdullayeva və 40 saylı məktəbin direktor əvəzi Ramil
Hümbətəliyev işdən azad olundular.
Hətta bu il ərzində qandallanan sumqayıtlılar
da oldu. Belə ki, 2005-2015-ci illərdə
isə "Təhsil” Respublika İdman Mərkəzinin Sumqayıt filialında direktor
müavini işləyən Anar Nağdıyev mənimsəmədə, vəzifə səlahiyyətlərindən
sui-istifadə etməkdə ittiham edilərək məhkəmə zalındaca həbs edildi və 8 il azadlıqdan məhrum edildi.
Ümid edirik ki, qarşıdan gələn 2018-ci il xoşagəlməz,
kədərli deyil, gözəl, sevincli hadisələrlə
yaddaşlara həkk olunar.
Elnarə
Salamova
Xeberle.com
Xəbərdən istifadə edərkən istinad etmək vacibdir.
