Xeberle.com olaraq davamlı şəkildə sosial şəbəkələrdə sorğular keçiririk. Bu dəfə isə istifadəçilərimizə "Sumqayıtı təmsil edən deputatları tanıyırsınızmı?" sualını ünvanladıq.

Sorğumuzda 100-dən çox sumqayıtlı istifadəçi iştirak edib. Nəticəyə əsasən şəhərlilərin 67 %-i Sumqayıtı təmsil edən deputatların kimlər olmasından, hansı işləri görmələrindən xəbərsizdirlər.

Şəhərlilərin 33 %-inin tanıdığı deputatların sıralaması isə bu cürdür:

1. Muxtar Babayev - 15 % ;

2. Tahir Mirkişili - 11 % ;

3.Hacı Salayev - 5 % ;

4. Mirzəcan Xəlilov - 2 %.

Bildirək ki, virtual sorğuda iştirak edən istifadəçilər arasında fikir mübadiləsi də aparılıb. Onlar tanıdıqları deputatların şəhərdə gördüyü işlərdən də bəhs edib. Fikirlərini bildirən 2 gənc şəhərlinin sırasına isə Sumqayıtı təmsil edən deputat Tahir Mirkişili də qoşulub. T. Mirkişili sorğuda ona ünvanlanan sualları da cavablandırıb. Onun yazdığı fikirləri olduğu kimi təqdim edirik:

"İlk öncə vətəndaş mövqeyinizə görə minnətdarlığımızı bildiririk. Düşünürük ki, diskussiya aparmaq üçün ilk öncə doğru informasiyaya sahib olmaq daha faydalı olardı. İlk öncə qeyd edim ki, mən 10 il Sumqayıtda yaşamışam, 5-ci və 3-cü mikrorayonlarda. Təvazökarlıqdan uzaq olsa da, deputat olmazdan daha əvvəllər də Sumqayıt gənclərinin işgüzarlığına və istedadlığına inandığımızdan müxtəlif vaxtlarda 50-dən çox gəncin işlə təmin olunmasını təmin etmişik, ASAN xidmət mərkəzlərinin məhz 2-cisinin Sumqayıtda açılması üçün müəyyən xidmətlər də göstəmişik. Ancaq bunları yazmaqda nə isə etdiyimizi göstərmək deyil, Sumqayıt gənclərinin inkişafı səylərinin deputat vəzifəsi ilə bağlı olmadığını qeyd etməkdir. Sizin yazdığınız məişşət tullantıları ilə bağlı xahiş edirəm bu linkə nəzər yetirəsiniz (https://azertag.az/.../Sumqayitda_meiset_tullantilarinin...) Düşünürəm ki, sizin iddianıza cavab burda var. Bu iş durmadan gedir, bu xarici investor bizim fəaliyyətimiz nəticəsində Sumqayıt gəlib,elə də asan məsələ deyil, əminəm ki. bu həll olunacaq. Vətəndaşlarla görüşlər üçün biz daim açığıq, müraciət edən istənilən seçicinin həssaslığını qəbul edirik. Məncə heç bir deputat hazırda öz fəaliyyətini PR üzərində qurmur. Sizin də hər hansı müraciətiniz olarsa, bizim bütün kommunikasiya imkanlarımız açıqdır - telefon, e mail, sosial şəbəkələr, YAP inzibati binasında otaq və deputat köməkçisi bütün seçicilər üçün əlçatandır. Bu kommenti oxuduğunuz üçün təşəkkür edirik!"

Xatırladaq ki, şərh yazan istifadəçilər arasında millət vəkilləri Muxtar Babayev və Hacı Salayev barədə kifayət qədər pozitiv fikirlər söylənilib.

Məlumat üçün bildirək ki, Sumqayıtda 4 seçki dairəsi mövcuddur. Bu dairəni təmsil edən deputatlar aşağıdakı şəxslərdir:

1. 41 saylı Sumqayıt I seçki dairəsi - Mirzəcan Xəlilov

2. 42 saylı Sumqayıt II seçki dairəsi - Tahir Mirkişili

3. 43 saylı Sumqayıt III seçki dairəsi - Muxtar Babayev

4. 44 saylı Sumqayıt-Xızı seçki dairəsi - Hacı Salayev

Qeyd edək ki, növbəti yazılarımızda Sumqayıtı təmsil edən deputatlar haqqında geniş məlumatları sizlərin nəzərinə çatdıracağıq.

Hicranə İsmayılova

Xeberle.com