Bu gün 1997-ci ildə ümumilli lider Heydər Əliyevin sərəncamı ilə təsdiq olunub. Bu, Heydər Əliyevin gəncilyə göstərdiyi diqqət və qayğının bir nümunəsi idi. Gənclər günü MDB məkanında və Şərqi Avropa ölkələri arasında ilk dəfə olaraq Azərbaycanda qeyd olunub. 1996-cı ildən başlayaraq Azərbaycanda Gənclər günü qeyd olunandan sonra, digər MDB ölkələrində və Şərqi Avropa dövlətlərində də bu gün qeyd olunmağa başladı. Azərbaycanda hər il Gənclər günündə bütün istiqamətlər üzrə fəaliyyət göstərən gənclər yekun hesabat verirlər.

Hazırda şəhərimizdə də bu gün xüsusi olaraq qeyd edilir. Həmçinin Sumqayıtda bir sıra gənclər təşkilatları da yaradılıb ki, onlar gənclər üçün bir sıra yeniliklərə və layihələrə imza atırlar. Bəs həmin təşkilatlar tərəfindən gənclər üçün hansı yeniliklər edilib və yə edilməsi nəzərdə tutulub? Xeberle.com olaraq sualımıza cavab tapmaq üçün "Sumqayıt Gənclər Evi”nin rəhbəri Pəri Vəliyeva və "Gənc Müəllimlər Şurası”nın sədri Aygün Rəhimova ilə əlaqə saxladıq.

Pəri Vəliyeva Sumqayıt Gənclər Evində gənclərimiz üçün keçirilən və keçiriləcək tədbirlərdən danışdı: "Bildiyimiz kimi, "Sumqayıt Gənclər Evi" sosial xidmət müəssisəsi 2015-ci ildə cənab Prezident İlham Əliyevin iştirakı ilə açılışı olub. Fəaliyyət göstərdiyi dövrdə 6 könüllü müsabiqəsi elan olunub ki, bu müsabiqədə ümumilikdə 200-ə yaxın gənc könüllülük fəaliyyətinə cəlb olunub. Gənclər bu fəaliyyəti ərzində bir sıra bacarıqlara yiyələnib, onların asudə vaxtları səmərəli təşkil olunub, həmçinin gələcəkdə öz karyeralarını qurma imkanlarını genişləndirmək üçün fürsətlər əldə ediblər. Bu gün gənclərin asudə vaxtlarının səmərəli təşkil olunması üçün dil kursları, karyera mərkəzi, kompüter, şahmat, rəsm, gitara, toxuculuq, səsyazma və fotostudiya dərnəkləri gənclərin tam ixtiyarına verilib. O cümlədən, gənclərin psixoloji durumunun yaxşılaşdırılması ilə bağlı təlim və psixoloji sorğuların keçirilməsi nəzərdə tutulub. "Gənclər Evi" sosial xidmət müəsisəsində həmçinin, rəsm sərgiləri, təlimlər, tədbirlər, müxtəlif dillər üzrə şifahi danışıq dərsləri keçirilir. Bu gün Gənclər Evinde ölkəmizin gənclər siyasətinin müəyyən edən dövlət proqramına uyğun olaraq vətənpərvərlik, sağlam həyat tərzinin təbliği və s. mövzularda tədbirlərin keçirilməsi nəzərdə tutulub. Həmçinin Gənclər Evi gənclərin təşəbbüslərinin dəstəklənməsində də böyük rol oynayır. Gələcək fəaliyyət istiqamətlərimizə nəzər salsaq, daha çox əlamətdar günlərin qeyd olunması, Azərbaycan xalqının başına gətirilmiş tarixi faciələrin, "Sumqayıt hadisələri", Xocalı soyqrımı", "31 mart Azərbaycanlıların soyqrımı günü" ilə bağlı müxtəlif tədbirlərin keçirilməsi və videoroliklərin hazırlanması, o cümlədən müxtəlif internet resuslarında həmçinin sosial şəbəkələrdə dövlətçiliyimizi və vətənpərvərliyi təbliğ edilməsi nəzərdə tutulur. Yay aylarında isə şəhər Gənclər və İdman İdarəsinin təşkilatçılığı və dəstəyi ilə günü-gündən gözəlləşən şəhərimizdə, xüsusilə cənab prezidentin "möcüzə" adlandırdığı Sumqayıt dənizkənarı bulvar ərazisində ekoloji mühitin qorunması istiqamətində, şəhərimizin yenidən qurulmaqda olan nəqliyyat infrastrukturunda sərnişin və sürücülər arasında ictimai davranış qaydaları barəsində müxtəlif maarifləndirici təbliğat işlərinin aparılması nəzərdə tutulub.

Bu gün bütöv Azərbaycan fonunda Sumqayıt gəncliyi də ölkə rəhbərliyinin, Gənclər və İdman Nazirliyinin, şəhər rəhbərliyinin xüsusi diqqət və qayğısı ilə tam əhatə olunub. Son 2 il ərzində Sumqayıt şəhərində gənclərin hərtərəfli inkişafı üçün hər cür imkanlar yaradılıb ki, bu da gənclərimizin dövlətçilik və vətənpərvərlik ruhunda tərbiyə olunması üçün mühüm əhəmiyyət kəsb edir”.

Aygün Rəhimova da sədr təyin olunduğu gündən etibarən gənclər üçün göstərdikləri fəaliyyətlərdən söhbət açdı: "Sumqayıt şəhər Gənc Müəllimlər şurasının sədri olaraq bu vəzifəyə tam bir il bundan öncə təyin olundum.Təyinatımın elə ilk günündən etibarən işə başladım. Gəlin bir reallığı qəbul edək ki, bu təşkilat əvvəlki, yəni yarandığı ilk vaxtlardakı marağını itirib. Bunun səbəbini isə surətlə inkişaf edən texnologiya və kompyuterlərin həyatımıza inteqrasiyada görürəm.

Təşkilat yarandığı ilk vaxtlar onun qayəsini, işini və nizamnaməsini öyrənmək üçün ilk sədrinin axtarışına çıxdım. Tərkibi, gördükləri işlərlə tanış olandan sonra nə qədər çətin işin içində olduğumu anladım.Çox təşəkkürümü bildirirəm Təhsil şöbəsinin müdiri Nizami müəllim mənə əlindən gələn bütün imkanları yaratdı. Bütün təhsil ocaqlarında 35 yaşa qədər nə qədər gənc var hamısını qeydə aldım və "Xocalı qan yaddaşımızdır” adlı ilk tədbirimi həyata keçirdim, canlı şahid tapdım. O dəhşəti yaşamış birinin ilk dəfə tədbirdə iştirakı görməyiniz lazımdı... O zaman Xocalının vəzifədə olan şəxslərindən dəvət etmişdim. Gənclər İdman baş idarəsinin, müəssisə, təşkilatların iştirakı ilə baş tutan tədbirimiz DTV tərəfindən lentə alındı. Növbəti tədbirimiz Sumqayıt şəhər Gənclər və İdman Baş İdarəsinin dəstəyi ilə baş tutan 8 Mart Beynəlxalq Qadınlar Günü ilə əlaqədar oldu. Daha sonra Mart soyqrımı ilə əlaqədar olaraq yenə də şəhər Gənclər və İdman Baş İdarəsi ilə anım tədbiri təşkil etdik. Aprelin 11-də Millət vəkili Qənirə Paşayevanın, Prezident yanında QHT –nin rəhbəri Emin müəllimin və Aprel şəhidlərinin ailə üzvlərinin iştirakı ilə şəhid Baxışov Seymurun yaşadığı binada xatirə barelyefinin açılışına həsr olunmuş tədbir oldu. Ümummilli liderimiz Heydər Əliyevin anadan olmasının 94 illiyi ilə bağlı 15 saylı məktəblə birgə Heydər Əliyev Mərkəzində möhtəşəm tədbir təşkil etdik. 28 May Respublika Günü münasibətilə yenə də Respublika Gənc Heydərçilər Təşkilatının köməyi ilə möhtəşəm bir tədbir təşkil etdik”.

Biz də Xeberle.com kollektivi adından gənclərimizi və özünü gənc hesab edən hər bir şəxsi "2 fevral Gənclər Günü” münasibətilə təbrik edir, onlara həyat fəaliyyətlərində uğurlar arzulayırıq.

Elnarə Salamova

Xeberle.com