"Son məktub"un uğurları bununla da bitmir. Türkiyənin "İQ" nəşriyyatından mənimlə əlaqə saxlayaraq kitabımın artıq yenidən çap olunacağını dedilər. Bir vaxtlar məni qeyri-ciddi ədəbiyyat yaratmaqda günahlandıranlar artıq Türkiyədə uğurlarımı görəndən sonra deməyə sözləri qalmayıb. Ancaq bir şey də demək istərdim ki, bu mənim uğurlarımın yalnızca bir hissəsidir. Gələcəkdə yazıçı kimi qazanacağım uğurlar daha böyük olacaq. O ki, qaldı xırda-para adamların mənə hücum etməsi, bütün bunlara demək olar ki, son qoyulub".

Varisin bu açıqlamasına münasibət öyrənmək üçün tanınmış qələm adamlarına müraciət etdik. Şair Aqşin Yenisey bu məsələ ilə bağlı sərt sözlər dedi: 

"Ədəbiyyatda kəmiyyət və keyfiyyət məsələsi var. İnsanlar turpu, tərəvəzi ehtiyacı olduğu üçün alırlar. Ədəbiyyatı da tərəvəz alveri şəklinə salmaq yolverilməzdir. Çingiz Abdullayev bu dəqiqə dünyada Azərbaycanın ən çox oxunan yazıçısıdır. Ancaq dünya ədəbiyyatından bir dənə də olsun ciddi yazıçı yoxdur ki, desin, mən Çingiz Abdullayevin əsərindən faydalanmışam. Ona görə düşünmürəm ki, Varisin hansısa ölkədə kitabı çıxıbsa, bu artıq ədəbiyyat brendi olmaq deməkdir. Əgər mənə Varisin yazdığı hər hansı bir əsəri yazmaq təklif olunsa, mən onu iki günə yazaram. Varis də, Çingiz Abdullayev də bilirlər ki, onlar yazıçı deyillər. Onlar sadəcə, yazı taciridir. Məncə, Varisin dünyaya çıxması bizim əleyhimizədir. Çünki onlar bizi bambılı bir xalq kimi təbliğ edirlər".

Yazıçı Seymur Baycan Varisin bu uğurunu yüksək qiymətləndirdi: "Varis haqqında həmişə pis yazılar yazılıb. Ancaq mən onu alqışlamışam. Çünki Varis Azərbaycanda çox insanlara kitab oxutdurub. Bunu kitab mağazalarında görürəm. Varis, Elxan Qaraqan, Elxan Elatlı elə bir təbəqəyə kitab oxutdururlar ki, ciddi ədəbiyyata iddialı olan yazıçıların həmin təbəqəyə çıxışları yoxdur. Mən Varisin kitabının xaricdə çıxmasına sevinirəm. Buna görə də onu təbrik edirəm".

Şərif Ağayar isə hələ də Varisi qəbul etmək fikrində deyil: "Mən özümə Varisdən də, onun 10 min Azərbaycan oxucusundan və 4 min Türkiyə oxucusundan da çox inanıram. Varisin necə yazıçı olduğunu, imkanlarının hüdudlarını yaxşı bilirəm. O, Nobel alsa belə, mənə görə heç nə dəyişmir. Varisin yolunu qəbul etmirəm. O yolla haracan gedirsə, məni maraqlandırmır. Amma lütfən bilin ki, bu tənqidi fikirlərimin onun şəxsiyyətinə heç bir aidiyyəti yoxdur. Varisi mədəni bir adam kimi tanıyıram və hörmət edirəm. İşlərində isə uğurlar arzulayıram. O 4 min nəfərin 40 min olmasını arzu edirəm".

/teleqraf.com/