Azərbaycan Demokratik Tələbə Gənclər Təşkilatının (ADTGT) 6 nəfərlik nümayəndə heyəti tərəfdaşlıq şəklində Avropa İttifaqının Erasmus+ Proqramı çərçivəsində keçiriləcək beynəlxalq təlim və şəbəkələşmə layihəsinə iştirak edəcəklər. 2018-ci ilin 8 – 15 may tarixlərində Türkiyənin tarixi Bayburt şəhərində keçiriləcək beynəlxalq tədbir "Gənclərin urbanizasiyası – yeni reaksiyalar verməlidir” adlanır.
Marmara Universiteti "Gənc İdarəçilər Klubu”nun təşkilatçılığı və Türkiyə Erasmus+ Milli Agentliyinin maliyyə dəstəyi ilə təşkil olunacaq beynəlxalq təlimə 6 ölkədən (Türkiyə, Azərbaycan, Macarıstan, Rumıniya, Slovakiya və Ukrayna) 30 gənc lider qatılacaqdır. ADTGT-nin beynəlxalq tərəfdaş olduğu bu layihə çərçivəsində iştirakçılar 1 həftə ərzində müxtəlif interaktiv təlim metod və vasitələri ilə maariflənəcək, yeni bilgi və informasiyalara yiyələnəcək və qarşılıqlı olaraq geniş təcrübə qazanacaqlar.
Beynəlxalq təlimdə ADTGT fəalları əcnəbi tərəfdaşları ilə birgə qeyri-formal təhsil üsulları ilə urbanizasiya, gənclərin şəhərlərə axını, şəhərlərdə məskunlaşması, gənclərin bu prosseslərə reaksiyaları, şəhərlərdə gənclər üçün açılan yeni imkanlar və s. kimi mövzularda zəngin məlumatlara yiyələnəcək, statistik və informasiya mübadiləsi aparacaq və iştirakçı ölkələrin bu sahədə təcrübəsini, keçdiyi yolu və inkişafını öyrənəcəklər. ADTGT üzvləri təlimdə Azərbaycan, onun urbanizasiya siyasəti, gənclərinin burada rolu və fəaliyyəti haqqında xüsusi təqdimatla çıxış edəcək və ölkəmizin tarixini, mədəniyyətini və müasir inkişafını nümayiş etdirəcəklər.
Layihə müddətində plenar açılış, təlim, görüşlər, işçi qruplar, tarixi, turistik yerlərin ziyarəti, mədəniyyətlərarası gecələr, flaşbomlar və digər maraqlı tədbirlər vasitəsilə fərqli mədəniyyətlərə malik gənclərin bir-birləri ilə daha yaxından ünsiyyət qura və əlaqələr yarada biləcəklər. Müxtəlif ölkələrin nümayəndələrinin burada iştirakı eyni zamanda gənclərin mübadiləsi vasitəsilə onlar və təmsil etdikləri ölkə və QHT-lər arasında gələcək mehriban dostluq və əməkdaşlıq münasibətlərinin daha da möhkəmləndirilməsidir.
ADTGT İctimai əlaqələr
və informasiya departamenti
Xəbərdən istifadə edərkən istinad etmək vacibdir.
