Naftalanda fəaliyyət göstərən "Gashalti Health Hotel" və "Chinar Hotel & SPA" otel-sanatoriyaları beynəlaxlaq sertifikatla təltif olunub. Belə ki, dünya şöhrətli "International Quality System for Medical SPA and Wellness EUROSPA” hər iki oteli Avropa keyfiyyəti sertifaktına layiq görüb. Bununla bağlı Xeberle.com-a açıqlama verən otelin baş direktoru Rasim Mirzəyev bildirib ki, sözügedən sertifikatlara layiq görülmək hər iki otel üçün mühüm hadisədir. Beynəlxalq təşkilatın ekspertləri uzun zaman bizim otellərin fəaliyyətini araşdırdı. Sonda bu nəticəni əldə etmək hər birimiz üçün böyük önəm kəsb edir. O söyləyib ki, otellərimizin bu uğuru cənab Prezidentimizin ölkəmizdə sağlamlıq turizminin inkişafı yolunda müəyyənləşdirdiyi strateji yol xəritəsinin ilkin nəticəsidir və respublikamızda bu sahənin inkişafında mühüm nailiyyətlərdəndir. Bu önəmli sertifikata layiq olduğumuza görə, hər iki otelin bütün kollektivinə dərin minnətdarlığımı və təşəkkürümü bildirirəm. Qeyd edək ki, bu sertifikata ölkəmizdə ilk dəfə olaraq adları çəkilən sanatoriyalar layiq görülüb. Xatırladaq ki, "Gashalti Health Hotel" və "Chinar Hotel & SPA" otel-sanatoriyalarının baş direktoru Rasim Mirzəyevə isə müvafiq təşkilat tərəfindən ekspert nominasiyası üzrə sertifikat təqdim edilib.