Yollarda aparılan təmir işləri zamanı baş verə biləcək qəza hadisəsilə bağlı Azərbaycan Avtomobil Yolları Dövlət Agentliyi xəbərdarlıq yayıb.
Agentlikdən bildirilib ki, hazırda Bakı şəhərində Mir Cəlal, Əsəd Əhmədov, Təbriz və Məhəmməd Hadi küçələrində, Babək prospektində, həmçinin Xırdalan-Binəqədi, Buzovna-Mərdəkan, Lökbatan-Qızıldaş-Güzdək, Səngəçal-Çeyildağ, Mehdiabad-Pirşağı, Maştağa-Nardaran avtomobil yollarında təmir işləri aparılır.
Agentlik sürücülərdən sözügedən ərazilərdə hərəkətdə olarkən diqqətli olmalarını, yol hərəkəti qaydalarına riayət etmələrini və aparılan işlərə anlayışla yanaşmalarını xahiş edir.
Qeyd edək ki, 2 gün öncə, 12 may tarixində Bakı Dairəvi-1 avtomobil yolunda üfiqi nişanlanma xətlərinin yenidən rənglənməsi işləri aparılarkən 90 FS 151 dövlət nömrə nişanlı yük maşınının sürücüsü idarəetməni itirərək maşını öncə yolda hərəkətdə olan "Pajero" markalı avtomobilə, daha sonra ərazidə xidmət aparan və həmin hissədə işlərin aparıldığı üçün yolun bağlı olduğunu sürücülərə işarələyən BDYPİ-nin Yol Patrul Xidməti avtomobilinə və Yol Xətt MMC-yə məxsus minik maşınına çırpıb.
Yük maşını daha sonra MMC-nin işçisi, 1972-ci il təvəllüdlü İlqar Əmirovu vurub və o, aldığı xəsarətlərdən hadisə yerindəcə dünyasını dəyişib.
(Axar.az)

Xəbərdən istifadə edərkən istinad etmək vacibdir.