Parlament Suriyada qanunsuz silahlı birləşmələrdə döyüşlərə qatılan Azərbaycan vətəndaşları barədə cinayət işinin qaldırılması təklif olunub. 

“Xeberdar.az”  xəbər verir ki, Milli Məclisin yaz sessiyasının bu gün keçirilən ilk plenar iclasında çıxış edən deputat Zahid Oruc bildirib ki, bəzi şəxslər müxtəlif bəhanələr və din pərdəsi altında Suriyadakı hərbi əməliyyatlara cəlb edilir:  

“Azərbaycan müstəqilliyi ərzində ilk dəfədir ki, belə ciddi fakt qarşısında qalıb. Söhbət hər hansı ad altında bu döyüşlərdə iştirak edən Azərbaycan vətəndaşlarından gedir. Bunu təşkil edən qüvvələr, onu həyata keçirənlər sanki dünya legionerləri kimi döyüşçüləri müxtəlif ölkələrdən yığırlar. Azərbaycan sükutla bu məsələnin üzərində keçə bilməz. Oradakılar döyüşlərdə sağ qalsalar, Azərbaycana dönəcəklər. Onlar əslində orada terror qruplarının tərkibindədirlər. Onlar artıq fərdi şəxslər deyillər. Bu şəbəkə sonrakı dövrdə də işləyəcək”. 

Deputat deyib ki, orada döyüşənlər təkcə öz ailələrinə zərbə vurmurlar: “Onlar həyatlarını itirirlərsə, bu faciə təkcə onların ailləsində olmur, həm də onların adları terrorçu qruplarda olduğuna görə, bu, Azərbaycanın ayağına yazılır. Ona görə də buna biganə qalmaq olmaz. Burada dini qruplar, ayrı-ayrı radikal dini təriqətlərin məsuliyyəti var. 

Mən təklif edirəm ki, Baş Prokurorluq Suriyada döyüşən Azərbaycan vətəndaşları haqqında mütləq şəkildə cinayət işi qaldırsın. Bu məsələnin qarşısını ala biləcək mexanizm məhz cinayət işidir. Bu insanlar bilməlidirlər ki, onlar bura qəhrəman kimi dönməyəcəklər. Bura gəlib sonra orada görüdükləri dəhşətləri Azərbaycanda tətbiq etmək istəyəcəklər. Bu qüvvələrin yükünü çəkmək çox çətin olacaq. Belə insanlara din, humanizm, güzəşt mövqeyindən yanaşılmasını deyil, məhz qanun prinsipindən yanaşılmasını təklif edirəm. Bununla əlaqədar qanuna da mütləq dəyişiklik edilməlidir”.

 Deputat Fərəc Quliyev isə bildirib ki, bununla bağlı daha çox maarifləndirici, profilaktik tədbirlər görülməlidir. Televiziyalarda mənasız verilişlərin yerinə, hərbi-vətənpərvərlik, maarifləndirici verilişlər verilməli, insanlar arasında təbliğat aparılmalıdır:  

“Onların adlarını istər muzdlu, istər başqa şey qoysaq da, onlar Azərbaycanın vətəndaşlarıdırlar. Onlar haqqında cəza tədbirləri seçməkdənsə, onları öz “kisəmizə” qaytarmalıyıq”. 

Yeni Azərbaycan Partiyası (YAP) icra katibinin müavini Siyavuş Novruzov deyib ki, bəzi qüvvələr son zamanlar internet səhifələrində Azərbaycana hədələyici bəyanatlarla çıxış edirlər. Onlar Azərbaycanda terror aktları törədəcəklərini bildirirlər. Həmin qüvvələrin arxasında konkret təşkilatlar və dövlətlər dayanırlar: “Lakin onlar bilmirlər ki, Azərbaycanla təhdid dilində danışmaq olmaz. Artıq o dövr deyil. Azərbaycan çox güclü dövlətdir”. 

Məsələ ilə bağlı Milli Məclisin sədri Oqtay Əsədov bunu ciddi məsələ hesab edib: “Lakin oradakı azərbaycanlıların hamısına terrorçu demək düzgün deyil. Ondan 2 dəfə çox Avropadan gələn nümayəndələr Azərbaycandakı döyüşlərdə iştirak ediblər. Onları terrorçu kimi damğalamaq olmaz. Bunun üzərində işləmək lazımdır. Bunlar muzdlu əsgərlərdir. Onların qarşısını almaq həqiqətən də çətindir. Bu məsələlərdə problemlər var”.