Məlumdur ki, Azərbaycan iqtisadiyyatının əsasını neft sənayesi təşkil edir. Lakin son illər ölkəmizdə qeyri-neft sektorunun ümumi çəkisi də neft sənayesinə paralel olaraq inkşaf etdirilməkdədir. Dünyanın əksər ölkələrində qeyri-neft sənayesini inkişaf etdirən əsas gəlir qaynağı kimi turizmi xüsusilə qeyd etmək lazımdır. Turizm sürətlə inkişaf edən və ölkəyə ən çox iqtisadi gəlir gətirən sektorlardan biridir. Buna görə də, inkişaf etmiş və inkişaf etməkdə olan ölkələr turizm fəaliyyətinə böyük əhəmiyyət verirlər. Bu sektor bir çox fəaliyyət sahələri ilə yaxın əlaqədə olduğu üçün oradan gələn gəlirlər də digərlərinə nisbətən iqtisadiyyata daha müsbət təsir göstərir.
Sumqayıtda turizmə maraq yüksək səviyyədədir
Son illər şəhərimizdə də turizm sahəsində irəliləyişlər müşahidə olunur.
Bu barədə Xeberle.com-a açıqlama verən "Palıd” travelin təsisçisi və direktoru Əjdər Məmmədov son dövrlərdə turizm şirkətlərinin sayınının artmasının şəhərimizdə xidmətlərdən faydalanmaq üçün şans yaratdığını bildirdi :
"Sumqayıtda turizmə maraq yüksək səviyyədədir. Əvvəllər şəhərimizdə turizm şirkətləri fəaliyyət göstərmədiyi üçün bu xidmətlərə görə sakinlər Bakıya üz tuturdular. Lakin son dövrlərdə turizm şirkətlərinin sayının artması Sumqayıtda xidmətlərdən faydalanmaq üçün şans yaradıb. Yayda sakinlər əsasən xarici ölkələrdən Türkiyəyə, qışda isə Dubaya səfər etməyi üstün tuturlar. Bunun da səbəbi oraya getmək üçün viza tələb olunmamasıdır. Daxili turizmdə isə yayda Şəki, Gəncə, Qəbələ, Oğuz, Naxçıvan (Duzdağ) və s., qışda Qəbələ, Tufandağ, Şahdağa getməyə üstünlük verirlər. Qiymətlərdə keçən ilə nisbətən bu il artım müşahidə olunur. Daxili turizm üçün iki nəfərlik və bir günlük otaq 80-90 AZN təşkil edir. Qiymət artımına xarici amillər də təsir göstərir. Məsələn, ötən il Rusiya ilə Türkiyə arasındakı münasibətlərin pisləşməsi ilə bağlı olaraq ruslar Türkiyəyə səfər etmirdilər. Ona görə də bu il keçən ilə nisbətən qiymətlərdə artım müşahidə olunur. Şirkətimizdə bütün növ turizm xidmətlərindən istifadə mümkündür (viza dəstəyi, incoming, outgoing və s.).
Quba, Qusar, Bakuriani, Dubay…
"Tourist” travel şirkətinin baş meneceri Pərvanə Ağayeva isə deyir ki, Sumqayıtda turizmə maraq Bakı ilə müqayisədə eynidir:
"Lakin Sumqayıt əhalisi elə bilir ki, Sumqayıtdakı travel şirkətlər Bakıdakı şirkətlərin filialı olduğundan şəhərimizdə qiymətlər bahadır. Bu baxımdan turlara olan tələbat azdır. Ona görə aviabiletlərin satışı tur paketlərə nisbətdə üstünlük təşkil edir. Təbii ki, canlanma keçən ilə müqayisədə üstündür. Bu, bizim öz satışlarımızda da biruzə verir. Qış mövsümündə Dubay (BƏƏ) və Bakuriani (Gürcüstan), yay mövsümündə isə Turkiyənin mövsüm bölgələri - Antalya, Bodrum, Kuşadasına səfərlər daha çox olur. Hal - hazırda endirimlər bitdiyinə görə, minimum qiymətlər bir nəfər üçün 400-500 USD - dən başlayır. Qiymətlərə gəlincə, azalma deyil, artım müşahidəsi var. Artım Türkiyə istiqamətində də özünü göstərir. Turistlər ötən il yayda 1 həftə öncə aldıqları tur paketlərin qiymətlərini bu ilə yalnız fevral və yanvar aylarında endirim vaxtı görmüş oldular”.
Sumqayıtda turizm potensialının aşağı olduğunu deyən "Sum Travel” şirkətinin təsisçisi və direktoru Cəlil Nəcəfov daha çox səfər edilən regionları da açıqlayıb:
"Sumqayıtda turizm potensialı çox aşağıdır. Şəhərimizin sakinləri daxili regionlar sırasında əsasən Quba, Qusar, Balakən, Şəki, Tovuz rayonlarına getməyi üstün tuturlar. Xarici ölkələrdən də sərfəli olduğu üçün ən çox Gürcüstana, nadir hallarda Dubaya getməyə üstünlük verirlər. Qiymətə gəlincə xarici ölkələrdən Gürcüstana səfərin minimum məbləği 100 AZN, Türkiyəyə 250 AZN, Dubaya 1000 AZN-dən çox təşkil edir. Bizim şirkətdə ötən ilə nisbətən artım və ya azalma olmayıb. Şirkətimizin turlarında adam sayı nə qədər çox olarsa, qiymətlər də bir o qədər aşağı olur.”
"Sülh Travel”-in satış müdiri Aygül Hacıyeva isə bildirdi ki, hər il şəhərimizdə turizmə maraq göstərən insanların sayı artır:
"Mən iki ildir ki, bu sahədə fəaliyyət göstərirəm. Hər il Sumqayıtda turizmə maraq göstərən insanların sayı artır. Ola bilər ki, sumqayıtlılar şəhərimizdə turizm şirkətlərindən xəbərdar olmadıqları üçün Bakıya axın edirdilər. Amma hazırda şirkətimizi tanıyanlar çoxalır və bunun nəticəsini də müştəri bazasının artması ilə görürük. Şəhərimizin sakinləri xarici ölkələrdən viza tələb olunmadığı üçün ən çox Türkiyəyə getməyi üstün tuturlar. Yayda Antalya, Bodrum, Kuş adası bölgələri, qışda isə daha çox Dubay səfərləri çox olur. Çünki Dubaya viza tələb olunsa da, şərtləri çox sadədir. Yalnız xarici pasport tələb olunur. Ölkədaxili isə yayda Şəki, Qəbələ, Quba, Qusar, Masallı bölgələrinə, qışda Şahdağ, Qəbələ, Tufandağ zonalarına daha çox səfər edilir. İstirahət deyiləndə hamının ağlına ilk olaraq yay mövsümü gəlir. Ona görə də ötən illərə nisbətən qışda şirkətimizə müraciət edənlərin sayı çoxalsa da, yayda müraciət edənlər daha çoxdur”.
Bahalaşan qiymətlər
A.Hacıyeva bildirdi ki, qiymətlər bu il bahalaşıb:
"Bildiyimiz kimi ötən il Rusiya ilə Türkiyə arasında vəziyyət bir az münaqişəli idi. Buna görə də ruslar Türkiyəyə istirahət üçün gedə bilmirdilər. Qardaş ölkənin də otellərinin əsas hissəsini rus turistlər təşkil edir. Ruslar gedə bilmədiyi üçün otelləri ucuz qiymətə verirdilər ki, müştəri potensialı artsın. Amma bu il barışıq olduqdan sonra qiymətlərdə bahalaşma hiss olunur. Bir çox turizm agentlikləri ilə müqayisədə biz müştərilərimiz üçün daha çox endirim kampaniyaları edirik. Amma sırf otellərin, biletlərin endirimi məsələsindən danışsaq, yayda istirahət etmək istəyənlər, yanvar, fevral aylarında bilet alsalar daha yaxşı olar. Çünki 1- 2 həftə qabaq alınan biletlərə nisbətən 3-4 ay əvvəl alınan biletlər daha ucuz olur. Hazırki qiymətlərə gəldikdə isə Türkiyə üçün 3 gecə 4 günlük tur paketin minimum qiyməti 600-700 AZN, Dubay üçün isə eyni tur paket üçün minimum qiymət 800 AZN təşkil edir. Daxili turların qiyməti isə 20-21 AZN-dir”.
Elnarə Salamova
Xeberle.com
Xəbərdən istifadə edərkən istinad etmək vacibdir.
