Dünyanın əksər ölkələrində insanlar istirahət etmək üçün həftəsonunu səbirsizliklə gözləyirlər. Çünki şənbə-bazar günlərində yaxın rayonlara, istirahət mərkəzlərinə yollanır və işin yorğunluğunu dincəlməklə çıxarırlar. Demək olar ki, əcnəbilər üçün weekend - "həftəsonu istirahəti” bir növ həyat tərzinə çevrilib. Məsələn, son vaxtlar Türkiyədə də istirahətin bu növünə geniş üstünlük verilir. Ölkənin ayrı-ayrı bölgələrinə səyahət edənlər parklarda, dənizin və göllərin kənarlarında «piknik»lər təşkil etməklə həftə sonlarını maraqlı keçirirlər.
Qeyd edək ki, son illər Azərbaycanda da həftəsonu istirahətə diqqət artıb. Kütləvilik təşkil etməsə də, maddi imkanı olanlar həftə sonlarını yaxın rayonlarda yerləşən istirahət mərkəzlərində keçirməyə üstünlük verirlər. Əlbəttə, kənd və qəsəbələrdə istirahətə gedənlər də az deyil.
Bəs necə etmək olar ki, bütün insanlar həftə sonlarını maraqlı keçirib, sözün əsl mənasında istirahətin dadını çıxarsınlar?
Həftəsonu «piknik»in geniş təşkili üçün regionlarda şərait yaradılmalıdır. Məsələ ondadır ki, aztəminatlı ailələr, tələbələr, təqaüdçülər həftə sonu dincəlmək istəsələr də, onların əksəriyyətinin buna imkanları yoxdur. Halbuki onlar da ailələri ilə bunu arzu edirlər.
Bəlkə tələbə və gənclər üçün ucuz qiymətə çadır düşərgələri təşkil etmək olar? Hətta hotellər, iki ulduzlu hotellər də tikmək olar. Çünki bu cür otellər qonşu respublikalarda mövcuddur. Ona görə də onların iş təcrübəsini öyrənmək, yaxşı nümunələri ölkəmizdə tətbiq etmək olar.
Bu baxımdan Sumqayıtda vəziyyət necədir? Maraqlıdır, "Gənclər şəhəri”ndə "piknik”lər təşkil etmək mümkündürmü?
Məsələ ilə bağlı Xeberle.com olaraq kiçik bir araşdırma apardıq. Mövzumuza ilk olaraq Sumqayıt şəhər Bulvar İdarəsinin rəisi Yavər Vəliyev fikrini öyrəndik. Y. Vəliyevin sözlərinə görə, dünyanın bir çox ölkələrində olduğu kimi, istirahət məqsədilə nəzərdə tutulan «piknik»in Azərbaycanda, hətta Sumqayıt bulvarında da təşkili mümkündür. Y.Vəliyev insanlardan təmizliyə və bəzi təhlükəsizliyə diqqət yetirmələrini tövsiyə etdi: "Əsas odur ki, gəzinti zamanı diqqətli olsunlar. Qayda-qanunlara əməl etsinlər. Bulvarın ərazisində kifayət qədər zibil qutusu var. Əllərindəki meyvə qalıqlarını, kağız qırıntılarını, zibili yerə atmasınlar. Saqqızı, tum qabıqlarını yerə tökməsinlər. Uşaqları nəzarətsiz buraxmasınlar. İnsanların qazon və ya otluğun üzərinə çıxmağa icazə verilir. Yalnız təmizliyə riayət etmək və yaşıllığa ziyan vurmasınlar. Başqa heç bir məhdudiyyət yoxdur. Çünki biz nə ediriksə, vətəndaşlarımızın istirahəti üçün edirik, bu gözəlliyi onlar üçün yaradırıq. Ona görə də insanlar gərək qurduqlarımızı sökməsinlər, gül kollarını qırmasınlar, oturacaqları sındırmasınlar, dağıtmasınlar».
Su ətrafı ərazilərdə çadır qurmaq qadağandır, çünki...
Y.Vəliyev Sumqayıt bulvarı ərazisində əksər insanların məşğuliyyətinə çevrilən balıq tutmağa da icazə verildiyini bildirdi. "Piknik"ə gəldikdə isə su ətrafı ərazilərdə bunun mümkün olmadığını vurğuladı: "Çünki suya qarmaq atan zaman onu geri çəkərkən yaxınlıqda istirahət edən insanlara zərər yetirə bilər. Bu səbəbdən də biz su ətrafı yox, məhz torpaqda, qazonda "piknik”ə icazə veririk. Həmçinin dəniz kənarında çadır qurub əylənməyin qadağan olunduğunu söyləyən Y.Vəliyev buna səbəb kimi bəzi xoşagəlməz hadisələrin baş verə biləcəyini göstərdi”.
Azərbaycanda parklarda nəinki "piknik” etmək, hətta otun üzərində oturmağa icazə vermirlər
İqtisadçı ekspert Arzu Qafarlı da xarici ölkələrdə, xüsusilə də, Türkiyədə «piknik» mədəniyyətinin inkişaf etdiyini bildirdi. İstanbul başda olmaqla, böyük şəhərlərdə belə sahələrin sayının çox olduğunu, az qala şəhərin hər bölgəsində «piknik» üçün yerlər ayrıldığını dedi: «Azərbaycanda "piknik” mədəniyyəti o qədər də inkişaf etməyib. Bu sahəyə insanlarımızın marağı çox azdır. Azərbaycanda parklarda nəinki "piknik” etmək, hətta otun üzərində oturmağa icazə vermirlər. Yalnız oturacaqda əyləşib yaşıllığa tamaşa etmək olar. Ona görə də şəhər sakinləri "piknik” təşkil etmək üçün Qubaya, Qəbələyə, ya da Xızıya üz tutur».
Bakı və Sumqayıtda belə yerlərə çox az rast gəlinir
Azərbaycanda «piknik» üçün kifayət qədər ərazilərin olduğunu deyən Turizm Assosiyasiyasinda daxili turizm komissiyasının sədri, Baku Travel-Turizm şirkətinin icraçı direktoru Əziz Şiriyev insanların bu sahəyə marağının getdikcə artdığını söylədi: «İnsanların «piknik» təşkil etməyə marağı artmaqdadır. Çünki onlar təbii gözəlliyə meyl edirlər. Belə ki, insanlar meşəyə özləri ilə manqal, yaxud samovar apararaq mənzərəli, gözəl bir yerdə «piknik» təşkil edirlər. Bir də var ki, «piknik» əraziləri hər hansı bir istirahət mərkəzi tərəfindən müəyyən qiymətlərə təklif olunur. Məsələn, İsmayıllıda fəaliyyət göstərən və insanların istirahəti üçün hər cür şəraiti olan «Talıstan» istirahət mərkəzində "piknik” qiyməti bir nəfər üçün 5 manatdır. Amma Bakı və Sumqayıt istiqamətində belə yerlərə, demək olar ki, çox az rast gəlinir. Bakıdan Şamaxıya qədər olan məsafədə ən çox məşhur olan «Qobuland» istirahət mərkəzidir ki, adam sayına görə 2 və 3 manatdan başlayaraq qiymətlər dəyişir. Bunun özəlliyi isə insanların çox pul xərcləməməsidir. Yəni özlərinin apardığı ərzaqdan istifadə edib, yemək hazırlayırlar. Özləri istədikləri kimi əylənirlər. Bu cür mərkəzlər mədəni istirahət yerləridir. Ancaq heç bir parkda gedib tonqal qalayıb, samovar qaynatmaq olmaz».
Bütün bunlar bir daha təsdiqləyir ki, Azərbaycanın coğrafi mövqeyi "piknik” zonalarının salınması üçün olduqca əlverişlidir və o qədər də böyük vəsait tələb etmir. Digər ölkələrin praktikasına əsaslansaq, demək olar ki, şəhərimizdə "piknik” zonaları yaratmaq mümkündür. Çünki bu, insanların səhhətinə, psixikasına, onların ünsiyyətinə - bir araya gəlməsinə müsbət təsir göstərər və şəhər sakinləri həftəsonu şəhərdən kənara çıxmadan da "piknik” istəklərini reallaşdıra bilərlər.
Sevinc Məhərrəmqızı
Xeberle.com
Xəbərdən istifadə edərkən istinad etmək vacibdir.
