Zibillər daşınmır, ağaclar budanmır, asfalt və dam örtüyü təzələnmir...

Qışın yaraşığı qardır, soyuqdur, sazaqdır. Şükür Allaha ki, gözümüzü yolda qoymayıb öz bərəkət ruzisini bizdən əsirgəmədi.  Dünyanın əksər ölkələrində qış sərt keçir. Və bütün ölkələrin şəhər və bələdiyyələrindəki icra strukturları, kommunal təsərrüfat işçiləri öz işlərini bilir, üzərlərinə düşən vəzifələrin öhdəsindən gəlməyi bacarırlar. Mən əminəm ki, Sumqayıt Şəhəri İcra Hakimiyyəti və onun tərkibində fəaliyyət göstərən qurumlara da qışa hazırlıq üçün müəyyən vəsait ayrılıb.... Daha bu vəsaitin hara xərcləndiyi, necə xərcləndiyi isə sual doğurur. Belə olmasaydı, ”Qışa hazırıq” deyən strukturlar bu gün şəhərin təmizlənməsində, abadlığının qorunmasında bu qədər əziyyət çəkməzdilər.

Baxın, bu şəkilləri 4-cü məhəllədə lentə aldım. Qar yağandan  məhəlləyə bir dəfə də olsun zibil yığan maşın gəlib, onu daşımayıb. Vaxtında Şəhərin Yaşıllaşdırma İdarəsinə dəfələrlə zəng vurub xahiş etdik ki,  məhəllədaxili və  Əzizbəyov küçəsində olan ağaclara kultivativ və estetik qulluq göstərsinlər. Buna da məhəl qoyan olmadı. Bu gün həmin ağaclar qarın ağırlığına tab gətirməyib qırıldılar.

Və yaxud da bu yaxınlarda 4-cü məhəllənin sakinləri 40 nəfər sakinin imzası ilə şəhər icra hakimiyyətinə məhəllənin abadlaşdırılması, istilik xətlərinin çəkilməsi barədə məktub ünvanladı. Məktub elə bil ki, quyuya düşdü. Pəncərəsiz, qapısız bloklar, istiliksiz  binalar məhəllədə yaşayan işsiz adamlar üçün çox böyük maddi problemlər yaradır, çünki evlərinin isidilməsində əlavə elektrik və qaz sərfi edirlər ki, bu da pensiyaçı və xəstə adamların yaşam tərzinə uyğun gəlmir. Məhəlləmizin keçilməz yollarına axırıncı dəfə asfalt 80-ci illərdə çəkilib. Dam örtükləri dəyişilmədiyindən yağan qar əriməyə başlayandan sonra mənzillərin tavanlarından daman su sakinlərin rahat yatmasına da problem yaratdı.

Üzümü şəhərimizin çox hörmətli icra başçısı Eldar Əzizova tutub deyirəm:

“Eldar müəllim, ya verdiyiniz göstərişlər yerinə yetirilmir, ya da ki, əlinizin altında işləyən işçilər bacarıqsızdır. Məhəllələrə fərq qoyulmasın. Bizim 4-cü məhəllə İcra hakimiyyətinin binasının 300 metrliyində yerləşir. Buralara da baş çəkmək gərəkdir. Biz Somali vətəndaşları deyilik ki... İstəyirik şəhərin abadlaşdırılmasına ayrılan vəsaitdən bizim də məhəlləmizin abadlaşdırılması üçün ayrılsın!”

Aida Eyvazlı, jurnalist