Sumqayıt şəhərində "Nizami"
meydanı ərazisində "Bura zibil atmaq qadağandır" bildirişləri yerləşdirilib.
Maraqlısı odur ki, meydan ərazisində bir dənə də olsun zibil qabına rast gəlinmir.
Əvvələr burada tullantılar üçün kiçik həcmli zibil qablar olsa da hazırda rast gəlinmir.
Vətəndaş isə elanı oxuyaraq əlində tullantı zibil
qabı axtarır...
Məsələ ilə bağlı Sumqayıt şəhər Təmizlik
Departamentinin direktoru Atəş Rüstəmovla əlaqə saxladıq. A. Rüstəmov Xeberle.com-a ərazidən
qurum tərəfindən zibil qablarının götürülməsinin səbəbini belə əsaslandırdı: "Meydana
əvvəllər zibil qabları qoyulmuşdu. Əraziyə yaxın və ətraf ərazilərdə yerləşən
kommersiya obyektləri, ticarət mərkəzi və bazar hamısı bütün tullantılarını həmin
qablara gətirib atırdı. Demək olar ki, tullantıların çoxluğundan ərazidəki
zibil qabları görünməz olmuşdu. Ərazidə olan zibil qabları əhalinin
yüngül məişət tullantıları üçün nəzərdə tutulduğundan ora atılan böyük
tullantılar antisanitar vəziyyət yaradırdı.
Bu nöqteyi-nəzərdən departament ərazidəki zibil qablarını götürdü. Əhalinin
yüngül məişət tullantıları üçün isə 34-cü məhəllədə tullantı məntəqəsi var. Meydanın mərkəzinə
zibil yığılmasın deyə ticarət obyektlərinin
hər birinə özünə aid zibil qablarının yerləşdirilməsi zərurəti barədə məlumat
verilsə də, heç biri hələ ki, bu xəbərdarlığa məhəl qoymur".
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
