2018-ci ildə görülən işlərin yekunları və 2019-cu ildə qarşıda duran vəzifələr barədə Sumqayıt şəhər İcra Hakimiyyəti Başçısının 4 nömrəli sahə inzibati ərazi dairəsi üzrə nümayəndəliyin hesabat yığıncağı keçirilib.
Xeberle.com-a verilən məlumata görə, hesabat yığıncağında Sumqayıt şəhər İcra Hakimiyyəti başçısının müavini Fəzail Hüseynov, Sumqayıt şəhər İcra Hakimiyyətinin Ərazi idarəetmə və yerli özünüidarə orqanları ilə iş şöbəsinin müdiri Gündüz Əliyev, Sumqayıt şəhər İcra Hakimiyyəti başçısının 4 nömrəli sahə inzibati ərazi dairəsi üzrə nümayəndəsi Elvaris Əliyev, əlaqədar xidmət təşkilatlarının rəhbərləri və ictimaiyyət nümayəndələri iştirak ediblər.
Vurğulanıb ki, Sumqayıt şəhərində aparılan abadlıq və quruculuq işləri 4 nömrəli sahə inzibati ərazi dairəsi üzrə nümayəndəlik ərazisində də öz əksini tapıb. Nümayəndəliyin sahəsi 16.31 kvadratmetr, əhalisi isə 31 min nəfərdir. Xidməti ərazisi 47, 48, 49, 50, 51, 52, 53-cü məhəllələr, 16, 18, 20, 21-ci mikrorayon, eləcə də "Yaşıldərə" yaşayış massivinin az bir hissəsi və "Bağlar" massivini əhatə edir.
Hesabat dövründə elektrik enerjisi ,su,təbii qazın verilməsi və digər kommunal xidmətlərin yaxşılaşdırılması məqsədi ilə bir sıra işlər həyata keçirilib.
İstehlakçıların elektrik enerjisinə artan tələbatını nəzərə alaraq hesabat dövründə bir sıra yaşayış sahələrində elektrik enerjisinin fasiləsizliyini təmin etmək məqsədi ilə dairəvi elektrik sistemi yaradılıb.
Qeyd olunub ki, yüksək mərtəbəli binalarda yaşayan sakinlər üçün mühüm əhəmiyyət kəsb edən lift təsərrüfatında mənzil fondunda istismarı başa çatmiş liftlər dəyişdirilərək yeni liftlər quraşdırılıb sakinlərin istifadəsinə verilib.
Bildirilib ki, son illərdə şəhərdə 650-yə yaxın dam örtüyü vurulub. Hazırda nümayəndəlik ərazisində - 18-ci mikrorayonda, 47 və 48-ci məhəllələrdə işlər davam etdirilir. Qalan binalarda da dam örtüyünün vurulması cari ildə planlaşdırılır.
Ötən il ərzində küçə və prospektlərin abadlaşdırılması istiqamətində bir sira işlər görülüb. Nümayəndəlik ərazisində İsmət Qayıbov küçəsində əsaslı təmir işləri aparılıb. Binaların qarşısındakı hasarlanmış bağlar sökülərək tullantılardan təmizlənib, Yaşıllıq idarəsi tərəfindən ağacların budanması və yeni ağacların əkilməsi işləri görülüb, bardurlər dəyişdirilib. Piyada yolları bərpa edilib və asfalt örtüyü vurulub.
Məhəllə və mikrorayonlarda daxili ərazilərin abadlaşdırılaraq yenidən qurulması, abad məhəllələrin yaradılması istiqamətində xeyli işlər həyata keçirilib. 48-ci məhəllədə 8-ci binanın, 18-ci mikrorayonda 5-ci bina və 31-ci binaların qarşısında abad məhəllələr yaradılıb və əhalinin istifadəsinə verilib.
Sonda hesabat məruzəsi ətrafında müzakirələr aparılıb.
Çıxış edənlər görülən işlərə münasibətlərini bildirib, təkliflərini səsləndiriblər.
Xəbərdən istifadə edərkən istinad etmək vacibdir.
