Günümüzün əsas və aktual məsələsi. QONŞULUQ! Biz elə düşünürük ki, qonşu olmaq, yəni hər gün səhər işə gedərkən və qayıdarkən rastlaşdığımız şəxslərlə salamlaşmaq..!  Vəssalam! bu qədər yəni. Soyuqlaşırıq biz, uzaqlaşırıq fərd-fərd. Cəmiyyətin bütünləşməsinin qonşuluqdan başladığını unuduruq bəzən.

Ailələrin bir-birlərinə işləri düşə biləcək və yardıma ehtiyacları olduqda bir-birilərinin köməyinə yetişəcəkləri qədər yaxın olmaları, istənilən an görüşüb-danışacaq məsafədə yaşamalarıdır qonşuluq.

Bəzən kiçicik problemlər üzündən səni bir divarın ayırdığı insandan uzaqlaşırsan. Ondan qaçırsan, salam verməmək üçün yolunu dəyişirsən. Misal üçün sən zibil paketini qapının ağzına asmısan, pişik gəlib onu cırıb, zibil dağılıb yerə. Qonşun bunu görür əsəbləşir və  sənin qapını döyəcləyir. Sən də bundan əsəbləşib qapını açıb onu acılayırsan. Və beləcə, arada soyuqluq yaranır. Bu soyuqluq əvvəlcə hər iki evi, daha sonra digər qonşuları əhatə edir. Bu soyuqluq uzun zaman davam edir ta ki, hansısa toy və yas mərasiminin baş tutmasına qədər. O da müvəqqəti.

Bəs necə etməli? Qonşularla sıfır problem yaşamaq üçün necə davranmalı?

 Bəs necə etməli? Qonşularla sıfır problem yaşamaq üçün necə davranmalı?

Əbəttə, bəzən elə insanlar olur ki, onlarla ancaq səbirlə davranmaq lazımdır. Bu istisna haldır.

Təbii ki, fərdlər arasında düşüncə fərqlərinin olması Allahın bir təqdiridir. Həqiqətən də, insanlar zəka, düşüncə və qabiliyyət baxımından fərqli yaradılmışlar. Amma aralarında düşüncə fərqlərinin olması onları düşmənçiliyə deyil, əksinə, müsbət rəqabətə və irəliləməyə sövq etməlidir. Səmimi qonşuluq münasibətlərini inkişaf etdirərək hər cür haqsızlığın və yanlışlığın qarşısını almaq mümkündür. Göründüyü kimi, fərdi rahatlığımız, xoşbəxtliyimiz, ictimai birlik və bərabərliyimizlə yanaşı, beynəlxalq münasibətlərin müsbət istiqamətdə inkişafı üçün də önəm daşıyan qonşuluq münasibətlərini daim canlı tutmalıyıq.

"Ana-ataya, yaxın qohumlara, yetimlərə, yoxsullara, yaxın qonşuya, uzaq qonşuya, yanınızdakı dosta, yolda qalmışa və sağ əllərinizin malik olduqlarına gözəlliklə davranın..." (Nisa Surəsi, 36)

İnsanlara dirilik bəxş edən Quran gözəlliklə davranın deyir. Qonşunun hər mənfi xüsusiyyətinə gözəl əxlaqla cavab versən, o,  bunu bir dəfə, iki dəfə təkrarlayar və sonda utanar, tərk edər.

Fikir vermisiniz, dahi şəxsiyyətlərin həyatı barədə açılmayan faktları həmişə onun yaxınları danışıblar. Onların dahi olmasına səbəb isə insanlarla problemsiz və gözəl keçinməklə yaşamaları olub.

İmam Əlinin (ə): "Sizi Allaha and verirəm. Sizi Allaha and verirəm, qonşularınızla mehriban olun"

İmam Əlinin (ə) dünyasını dəyişərkən söylədiyi sözlər isə indiki insani təmasların sütünu kimidir. Görün necə təkidlə bəşəriyyətə mesaj verir: "Sizi Allaha and verirəm. Sizi Allaha and verirəm, qonşularınızla mehriban olun."

Mehribançılıq açılmayan düyünləri açır. Dünyanın ən tündxasiyyətli insanı belə mehriban davranış qarşısında ram olur.

Sizcə, bu tövsiyələrə əməl edən şəxsin qonşusu ilə arasında hər hansı bir narazılığı olarmı?

Qonşun səndən kömək istəsə kömək etsən, borc istəsə borc versən, başına bir müsibət gəlibsə ona ürək-dirək versən, könlünü alsan, xeyir işi olanda onu təbrik edib gözaydınlığı versən, xəstələnsə ona baş çəksən, halı ilə maraqlansan, evinə bir şey alanda onun üçün də hədiyyə göndərsən, evində bişən yeməkdən onada təklif etsən, qonşuluqda hər hansı problem yaşanarmı? Odur ki, tələsin! Qonşularla problemlərin düyünlərini açmağa çalışın.

Tural Həsənli 

/birlik.az/