Bakı Beynəlxalq Avtovağzalı köçürüləcək. Bu barədə FaktXəbər-ə məlumat daxil olub. Məlumata əsasən ölkədaxili (rayonlararası) sərnişin avtobusları üçün Ceyranbatan qəsəbəsində və Qaradağ rayonunda yerləşən “Binə” və “Sədərək” ticacət mərkəzlərinin yaxınlığında yeni avtovağzal inşa ediləcək. Hazırda fəaliyyət göstərən Bakı Beynəlxalq Avtovağzalı isə yalnız ölkəxarici sərnişin avtobusları üçün nəzərdə tutulacaq.
Məlumatın doğruluğunu dəqiqləşdirmək üçün Nəqliyyat Nazirliyinin İctimaiyyətlə əlaqələr şöbəsinin rəhbəri Namiq Həsənova müraciət etdik. Bakı Beynəlxalq Avtovağzalının köçürüləcəyi ilə bağlı məlumatın olmamasını açıqlayan Namiq Həsənov FaktXəbər-in sorğusuna cavab olaraq bildirdi ki, avtovağzalın köçürülməsi və yeni avtovağzalın tikilməsi ilə əlaqədar hər hansı bir layihə yoxdur, olarsa, mətbuatda yayımlanacaq.
Bakı Beynəlxalq Avtovağzalın növbə rəisi Nüsrəddin Lalayev isə avtovağzalın köçürüləcəyi ilə bağlı xəbəri ilk dəfə bizdən eşitdiyini bildirdi: “Bizə belə bir məlumat daxil olmayıb.”
Qeyd edək ki, Bakı Beynəlxalq Avtovağzalı 2009-cu ilin fevral ayından etibarən fəaliyyətə başlayıb.
2009-cu ildə Bakı Beynəlxalq Avtovağzalın tikintisinin 80 milyon ABŞ dollarına başa gəldiyi bildirmişdi.
Xəbərdən istifadə edərkən istinad etmək vacibdir.
