Taksi istifadə etdiyimiz ictimai nəqliyyat vasitəsidir. Bir vaxtlar başında papaq, orta və yuxarı yaşlı, bəzən də əlində təsbeh oynadan kişilər "taksi sürücüsü tipajı" idilərsə, indi bu obraza çox nadir halda rast gəlmək olar. Artıq taksi sürücüləri arasında müxtəlif yaş kateqoriyalarından olan insanlara rast gəlmək olar. Özü də təkcə kişilərə yox, həm də qadın sürücülərə.

Xanım sürücüyə yaxınlaşıb, "Sahil" metrostansiyasına getmək istədiyimizi deyirik. İsrarlarımıza baxmayaraq, bizə qiymət söyləmir.

Yol boyu elədiyimiz söhbət zamanı aydın olur ki, o, müştərisinə qiymət demir. Hətta uzaq yol olsa belə, bu, onun yazılmamış qanunudur. Taksi sürücüsü Gülər Zamanova işə bağladığı günləri xatırlayır və APA TV-nin əməkdaşı ilə təəsüratlarını bölüşüb: “İlk müştərim yadımdadır. Taksini üstünə qoyub getdim. Bir müəllim əl elədi. Yanında balaca uşaq var idi. Mən onu götürdüm. Yaxında düşəcəyini dedi. Aparana kimi çəkinə-çəkinə sürdüm. Məndən soruşdu ki, nə vaxtdan işləyirəm. İlk müştərim olduğuna görə pul almaq istəmədim. Razılaşmadı, zorla verdi".

3 ildir, taksi sürücüsü işləyən Gülər Zamanova daimi müştərilərinin qadınlar olduğunu bildirir. Onun təbirincə desək, bunlar qısqanc kişilərin həyat yoldaşlarıdır. Deyir ki, daha çox kişi işi sayılan bu peşə onun daxilindəki qadın incəliyini sıxışdıra bilməyib: "Bu sənət daxilimdə qadın incəliyini öldürməyib, amma hərəkətlərimdə bir az var. Bu da kişi işlərini görməklə əlaqəldir. Daxilimdə qadın incəliyi necə var idi, elədə qalıb. Hərdən özüm öz yadıma salıram ki, axı mən xanımam".

Gülər deyir ki, taksi sürücülüyü peşəsini iki səbəbdən seçib. Maddi ehtiyac və bu sənətə olan marağına görə. İşlədiyi müddətdə başına maraqlı hadisələr gəlib: "Ola bilməz ki, taksidə çalışasan, başına maraqlı hadisə gəlməsin. Bir dəfə bir kişi əyləşdi maşına, 15 dəqiqə getmişik, hələ qadın olduğumu sezməyib. Ondan hara gedəciymizi soruşanda təəccübləndi".

Gülər taksi sürücüsü peşəsinə o qədər öyrənib ki, başqa sahələrdə çalışa bilməyəcəyini deyir: "Mən özüm idmançı olmuşam, güləşlə, boksla məşğul olmuşam. Mühafizə xidmətində işləmişəm. Heç vaxt satıcı işləyə bilmərəm. Ev işləri ilə məşğul ola bilmərəm".

O deyir ki, əvvəllər ata-anası da taksidə işləməyinə razı olmayıb. Taksidə bir müddət çalışdıqdan sonra artıq öyrəşiblər: "Oğlum da hər gün işə gedəndə "ehtiyyatlı ol, səninlə fəxr edirəm deyir" mənə. İndiki narahatlıqları isə sadəcə evə gec qayıtmağımla bağlı olur".

Maraqlı olanı budur ki, bu xanım maşınının hansısa detalı xarab olanda təmir işlərini də özü görür: "Ustaya getməzdən əvvəl maşının ehtiyyat hissəsini alıram. Usta hardan bildiyimi soruşur. Ona elə suallar verirəm ki, deyir, şagirdlərindən daha yaxşı bilirəm".

Yollardakı tıxaclara gəlincə, müsahibim "Bakıda tıxac çoxdur, çətinlik çəkirəm, amma gərək dözək" deyir. İşlədiyi müddətdə 3 dəfə qəzaya düşüb. Hesab edir ki, qəzaları

heç vaxt onun günahı ucbatından olmayıb. Qadın olmasına baxmayaraq, ona pul verməyib qaçan müştərilər də olub.

Açığı yolu necə gəldiyimi bilmədim. Bəlkə də bu həmsöhbətimin maraqlı adam olmasına, bəlkə də qadın olmasına görə, deyə bilmərəm. Bildiyim bircə bu idi ki, insan sevdiyi işlə məşğul olanda, rahat, xoşbəxt və maraqlı görünür, Gülər kimi...