Dekabrın 25-də üzərinə benzin tökərək özünü yandıran, üç gün xəstəxanada qalandan sonra da dünyasını dəyişən II qrup Qarabağ əlili Zaur Həsənovun ölümündən sonra onun problemləri ilə bağlı müxtəlif araşdırmalar aparıldı.

Hamı bu məsələ ilə maraqlanır, onun haqqında daha çox bilgi toplamağa çalışırdı. Zaur Həsənovun vəfatından əvvəl və sonra çox şeylər oldu. Qazi hələ dünyasını dəyişməmişdən öncə prezident İlham Əliyev işə şəxsən müdaxilə etdi, müvafiq tapşırıqlar verdi. Bu tapşırıqlardan sonra Qarabağ qazisinin ailəsinə onun hələ vəfatından əvvəl maddi yardım edildi, dəstək ifadə olundu, ölümündən sonra isə yas mərasiminin bütün xərcləri ödənildi.

Qazinin ölümündən sonra onu ölüm həddinə çatdıran problemlər, səbəblər, bu işdə əli olanlar haqda da ən müxtəlif fikirlər bildirilidi. Z.Həsənov ölümündən əvvəl dəfələrlə bu məsələdə ilk günahkarın Azərbaycan Həmkarlar İttifaqları Konfederasiyasının (AHİK) sədri, deputat Səttar Mehbalıyev olduğunu deyirdi.

Qarabağ qazisi özünü yandırdıqdan sonra onun borclu olduğu banklar, onun obyektini əlindən alan AHİK rəhbərliyi, bu məsələdə günahkar olan məmurlar, hakimlər ciddi şəkildə tənqid hədəfinə çevirildi.

Z.Həsənov ölümündən əvvəl mətbuata açıqlamalarında haqlı tərəf olduğu halda da bütün məhkəmə proseslərində S.Mehbalıyevə uduzduğunu deyirdi. AHİK rəhbərliyi də məhkəmə qərarlarını əsas gətirərək Z.Həsənovun yalan danışdığını, obyekt söküldüyü üçün əlilə heç bir kompensasiyanın ödənilməyəcəyini deyirdi. Lakin ödənildi. Həm də AHİK-in hesabına...

Bunlar artıq arxada qalıb. Bu işdə çoxunun bəlkə xüsusi diqqət yetirmədiyi bir məqam da var. Bu da Qarabağ qazisinin məhkəmə proseslərində onun əleyhinə qərar çıxaran hakimlərin kimliyidir.

Virtualaz.org saytı Z.Həsənovun S.Mehbalıyevə uduzduğu məhkəmələrdə işə baxan hakimlərin siyahısını təqdim edir:

1. Zaur Həsənovun işi üzrə onun əleyhinə qərar çıxaran 1 saylı Bakı Yerli İqtisad Məhkəməsinin (indi 1 saylı Bakı İnzibati İqtisad Məhkəməsi) hakimi Müseyib Bayramov.

2. Daha sonra həmin qərarı qüvvədə saxlayan Bakı Apelyasiya Məhkəməsinin hakimi Elmira Nağıyeva (əldə edilən məlumata görə, Elmira Nağıyeva Səttar Mehbalıyevin müavinlərindən birinin qardaşı qızıdır).

3. Z.Həsənovun əleyhinə verilən əvvәlki iki məhkəmə hökmünü qüvvədə saxlayan Ali Məhkəmənin hakimi Azər Hüseynov.

4. Sonda isə Ali Məhkəmənin sədri Ramiz Rzayev (onun Səttar Mehbalıyevlə yaxın dostluq əlaqələrinin olduğu deyilir).

Bax belə. Necə deyərlər, şərhsiz...

İlkin Muradov

/virtualaz.org/