Biri deyir ki, deputatlar gənc, yəni sütül adam olmalıdır. Bir
başqası bunu inkar edib bildirir ki, deputat yaşlı, təcrübəli, ağsaqqal
(və ya ağbirçək) adam olmalıdır. Bunlar yaşla bağlı təkliflərdir.
Cinslə bağlı təkliflər də irəli sürülür. Kimi deputatın kişi, kimi də qadın olmağını iddia edir.
Sosial statusla, lap elə iştaha və yemək-içməklə bağlı fikirlər də
maraq doğurur. Məsələn, uzun illərdən bəri Milli Məclisdə kök atıb
kökəlmiş bir deputat da bildirir ki, acları yox, artıq yeyib doyanları
deputat seçmək (?) lazımdır.
Reklama görə deputat olmaq
istəyənlər və onların tərəfdarları da az deyil. Məsələn, məşhur
adamların (artist, müğənni, aktyor, aparıcı, şoumen və b.) fanatları öz
kumirlərini bu uca kürsüdə görmək istəyir.
Bəlağətlə, həm də
ucadan danışmaq istedadı olanların da öz azarkeşləri var və bu
azarkeşlər öz sevimlilərini deputatlığa daha layiqli namizəd hesab
edirlər.
Siyasi xadimlərsə parlamentdə yalnız debat aparmaq qabiliyyəti olan kəsləri təsəvvür edir.
Əlbəttə, bu konuda başqa şərt və təkliflər irəli sürənlər də var.
Təbii ki, mənim də öz arqumentim var. Əvvəla, parlamentə adamları təyin
etmək yox, seçmək lazımdır. İkincisi, adamları yaş, cins, sosial
təbəqə, peşə və s. kimi amillə bağlı deyil, parlamentari təfəkkürünə
görə, həm də daha çox iqtisadi-hüquqi-siyasi və bir də fəlsəfi sahədəki
bilik, bacarıq və səriştəsinə görə bu instituta seçmək lazımdır.
(Sonuncu təklifi, yəni "fəlsəfi” məsələni özümə işarə olaraq dedim).
Yaxşı, dostum, bəs Sən kimi deputat görmək istərdin?
Firuz Mustafa
Xəbərdən istifadə edərkən istinad etmək vacibdir.
