Avqust qorabişən oldu.Azərbaycanlı gənc şair Tural Turanın "Türk kökənli milli ay adları” məqaləsi Türkiyədə keçirilən yarışmada münsiflərdən ən yüksək qiymət alıb. ANS PRESS-in məlumatına görə, Türkiyənin Ankara şəhərində "Avrasiya-Turan” araşdırmaları mərkəzinin "Özkökə qayıdış – dünənin izi ilə” məqalə, şeir və hekayə yarışmasının nəticələri bəlli olub.Yarışmada üç nominasiya üzrə ondan artıq ölkədən otuza yaxın iştirakçı qatılıb. Məqalə üzrə yarışın mövzu qalibi gənc şair, Dünya Gənc Türk Yazarlar Birliyi idarə heyətinin üzvü Tural Turan seçilib."Bu araşdırmanı hələ üçüncü kursda olanda başlamışdım. Araşdırmaları yığıb toplamaq 3 il vaxtımı alıb. Nəticədə 18 səhifəlik bir məqalə yazmışam. Həmin məqalədə göstərilən milli ay adlarımız xalq təfəkküründə ilişib qalmış, eləcə də bir çox tarixi və tutarlı türk mənbələrində keçən ay adlarımızdır. Məqsədim kökən etibarı ilə yad ünsürlərdən oluşan ayları öz aylarımızla əvəz etməkdir. Bunu tək Azərbaycanda deyil, bir çox türk ölkələrində qəbul etdirmək niyyətim var. Bunun üçün mübarizə aparacağam. Bu ay adları ortaq türk xalqlarının birgə istifadəsi üçün min bir əzab-əziyyətlə araşdırılıb üzə çıxarılıb” – deyə istedadlı gəncimiz Tural Turan açıqlamasında bildirib.Tural Turanın təklif etdiyi milli ay adları isə belədir:
Yanvar – ocaq, fevral – çillə, mart – bozay, aprel – çiçək, may – elat, iyun – qızmar, iyul – bürkü, avqust – qorabişən, sentyabr – yığım, oktyabr - əkin, noyabr – güzdək, dekabr – aralıq.