Şəhərimizdə bir çox irili-xırdalı marketlər əhaliyə xidmət göstərir. Daha çörək növbəsi dövrü keçib, hər binanın tinində bir mağaza, hər məhəllədə bir neçə müxtəlif ölçülü marketlər fəaliyyət göstərir.

Sumqayıt inkişaf etdikcə, əhali və onun alıcılıq qabiliyyəti artdıqca ticarət mərkəzlərinin də sayı artır.   

Şəhərin ayrı-ayrı nöqtələrində böyük, ikimərtəbəli, alıcıların rahat şəkildə alış-veriş edəcəkləri supermarketlər var. Hər birimiz alış-veriş üçün yolumuzu bu marketlərdən  salırıq. İstədiyimiz malları səbətə yığıb alış-verişimizi tamamladıqdan sonra kassaya yaxınlaşırıq. Hansı ki, bu supermarketlərin hər birində kassa aparatları mövcuddur və alıcılara aldığı hər malın qarşılığında çek verilir. Məsələn, sumqayıtlıların yaxşı tanıdığı " Ən Ucuz”, "Çinar”, "Araz”, " Ordubad”, "Pioner”, "Elmar” , "Bazarstore”, "Cövhər”, "Sum”, "Park”  və s. marketlər həm də şəhər sakinlərinin ən çox üz tutduğu marketlərdir.

Şəhərdə fəaliyyət göstərən bir çox marketlər isə kassa aparatlarına sanki "yox” deyiblər. Bir çox məhəlləarası, orta ölçülü marketlərin əksəriyyətində kassa aparatları yoxdur. Alıcılara aldığı ərzağın çeki verilmir. Ancaq bəzi böyük marketlərdə vergidən yayınmağın  yolunu çeksiz işləməklə tapıb.

Bəli, marketlərin alıcıya heç bir çek təqdim etməməsi iki səbəbdən neqativdir: birincisi, bu, büdcədən verginin yayınmasıdır. İkincisi isə alıcı hər hansı bir xoşagəlməz hadisə zamanı məhsulu bu marketdən aldığını heç bir vasitə ilə sübut edə bilməz.

Məsələn, "Qayalı” supermarketlər şəbəkəsinin 13-cü mikrorayonda fəaliyyət göstərən mağazası - böyük olmasına baxmayaraq burada alıcılara aldığı malın qarşılığında çek verilmir. "Şərq bazarı”nın yaxınlığında, 9-cu mikrorayonda yerləşən "Qayalı” marketdə isə kassa aparatları mövcuddur və hər alınan məhsulun qarşılığında çek verilir. Əldə etdiyimiz məlumata görə, "Qayalı”  supermarketlər şəbəkəsinin yaxın günlərdə 11-ci mikrorayonda açılacaq yeni mağazasında da kassa aparatları mövcud olacaq.

Bununla yanaşı,  2-ci mikrorayonda "Çinar”, "Ucuzluq”, 9-cu mikrorayonda "Vəfa”, "Ucuz market”, 13-cü mikrorayonda "Dünya”, 20 yanvar küçəsində "Gənclik”, "Ruslan”, Sülh küçəsində yerləşən "Ən ucuz market”də, Heydər Əliyev prospektində " Fəxri”, keçmiş "Dejurnu”, indiki "Növbətçi” mağazası ətrafında heç bir market kassa aparatından istifadənin zəruriliyini qiymətləndirmir. Azərbaycan prospektində "Elnur”, "Pepsi”, "Samir”,  Səməd Vurğun küçəsində "Market” adı altında fəaliyyət göstərən marketlərin bəzilərində kassa aparatları olsa da, alıcılara aldığı məhsulun qarşılığında çek verilmir. "Karvan” Ticarət Mərkəzinin birinci mərtəbəsində yerləşən "Karvan” market də çek verməyənlər sırasındadır.

   Mərkəzi bazarın yaxınlığında "Can” un məmulatları şirniyyat magazasında kassa aparatları olsa da, aldığımız şirniyyatın çeki təqdim olunmur.

   Abşeron rayonunun Saray qəsəbəsində yaşayanlardan çox az qismi olar ki, buradakı "Karvan” marketdən alış-veriş etməsinlər. Böyük olmasına baxmayaraq burada da eyni vəziyyət hökm sürür. Alıcılara aldığı malın qarşılığında çek verilmir. Bu sıraya "Sənan” marketi də əlavə etmək olar.

Ümid edək ki, müvafiq qurumlar bu yazıdan sonra lazımi tədbirləri görəcək və biz büdcəyə yönəlməli olan vəsaitlərin hara getdiyi barədə narahatlıq keçirməyəcəyik.

Bu işdə alıcılar da bir az aktiv olmalıdır - onlar marketlərdən hər hansı bir məhsulu aldıqda mütləq onun çekini satıcılardan tələb etməlidir. Bu, hər bir istehlakçının hüququdur. Bəlkə o zaman bu problem aradan qalxar və bütün marketlərdə kassa aparatları yerləşdirərlər.  (168saat.com)