"Azərsu” Açıq Səhmdar Cəmiyyəti (ASC) zəruri işlər aparılaraq "Abonent məlumatlarının dəyişdirilməsi” elektron xidmətinin göstərilməsinə başlayıb.

"Azərsu” ASC-nin mətbuat xidmətindən verilən məlumata görə, "Abonent məlumatlarının dəyişdirilməsi” elektron xidmətindən mülkiyyət hüquqları və abonentin şəxsi məlumatlarında dəyişiklik olduqda istifadə edilir.

Bilidirilib ki, yeni yaradılmış xidmət vasitəsilə əhali qrupu istehlakçıları bundan sonra abonent məlumatlarını www.azersu.az saytı vasitəsilə elektron müraciət edərək dəyişdirə biləcəklər. Hazırda bu xidmətin www.e-gov.az portalına inteqrasiyası istiqamətində işlər davam etdirilir.

Xidmətdən istifadə etmək üçün sistemə abonent kodu daxil edilir və bu zaman ekranda abonent məlumatları səhifəsi açılır. Burada abonentin adı, soyadı, atasının adı, yaşayış obyektinin adı, ailə tərkibi, şəxsiyyət vəsiqəsinin PİN kodu, göstərilən xidmətin adı və abonentin borcu barədə məlumatlar yerləşdirilib.

Bildirək ki, "Azərsu” ASC tərəfində daha 3 növdə elektron xidmət tətbiq olunur. İstehlakçılar içməli su və kanalizasiya xidmətlərinə görə borcları internet vasitəsi ilə öyrənə, internet və ödəmə terminalları vasitəsi ilə ödəniş edə bilər, ödəmə terminalları vasitəsi ilə smart kartların yüklənməsini həyata keçirə bilərlər. (salamnews.org)