Əlilliyi olan şəxslərin öz bizneslərini qurması və inkişaf etdirməsinə dəstək tədbirləri çərçivəsində Kiçik və Orta Biznesin İnkişafı Agentliyinin (KOBİA) Sumqayıt KOB İnkişaf Mərkəzində əlilliyi olan sahibkarlar üçün "Vergi və vergi güzəştləri” mövzusunda növbəti təlim keçirilib.
Pandemiya ilə əlaqədar zəruri qaydalara əməl olunmaqla təşkil olunmuş tədbirdə təlimçi-ekspert Əfqan Səfərli tərəfindən iştirakçılara Azərbaycan Respublikasının Vergi Məcəlləsi, vergi orqanında qeydiyyat, sahibkarların vergi öhdəlikləri, vergilərin hesablanması və ödənilməsi qaydası haqqında məlumat verilib, onlayn qeydiyyatdan keçmə və bu sahədə mövcud olan elektron xidmətlərdən istifadə əyani şəkildə nümayiş olunub, sahibkarları maraqlandıran suallar cavablandırılıb.
Qeyd edək ki, təlimlər Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə "Əlil Sahibkarlar Təşkilatı” ictimai birliyi tərəfindən "BMT-nin DİM prinsiplərinə uyğun Azərbaycanda ƏOŞ və digər həssas sosial qrupların davamlı iqtisadi inkişafın təmin edilməsində sahibkar kimi rolunun artırılması və bu sahədə mövcud problemlərin həllinə zəmin yaradılması” layihəsi çərçivəsində keçirilir.
Xəbərdən istifadə edərkən istinad etmək vacibdir.
