Şəhərimizdə brend mağazaların sayı günü-gündən artmaqdadır. Bəzən hesab edirlər ki, belə dükanların çoxalması insanlarda bazara olan təlabatı azaldır və çoxlarının marka xəstəliyinə tutulmasına səbəb olur. Ancaq əhalisinin orta aylıq gəliri 150-400 manat olan bir şəhərdə bu prosesin ləng getməsi asan proqnoza gəlir.

Maddi imkanı buna uyğun olmayan şəxslər də brend mallar geyinmək arzusunda olurlar. Bəzilərimiz isə bu arzularımıza çatmaq üçün belə mağazalardakı geyimlərin endirimə düşməsini gözləyirik ki, büdcəmizə uyğun nə isə alıb geyinə bilək. Əlbəttə, gözəl və zövqlü geyinmək hər kəsin haqqıdır.

Hazırda dekabr ayını yaşayırıq. Təzə ilin astanasındayıq. Brend mağazaların əksəriyyətində 30-50%- ə qədər bayram endirimləri başlayıb və bir müddətdir ki, davam edir.

Biz də bəzi mağazalara baş çəkdik.

Hər zaman zövqlü və gözəl geyimlərin satıldığı məkan kimi tanınan "Romantic” qadın və kişi geyimləri mağazasına yollanıb buradakı vəziyyətlə tanış olduq.

Mağazanın müdiri İbad Ələsgərov hazırda 40-50%-dək olan endirimin köhnə yeni ilə kimi davam edəcəyini bildirdi: "Bizim digər dükanlardan fərqimiz ondan ibarətdir ki, yeni sezon malları gələndə köhnə qiymət qalır, yanına da yeni endirimli qiymət vurulur. Heç vaxt alıcını aldatmırıq. Yalançı endirimlərdən söhbət gedə bilməz”.

Rəngarəng geyimləri və aksesuarları ilə seçilən "Romantic”də kişi gödəkçələri 69.90–dan 41 AZN-ə düşüb. Çəkmələrin öncəki qiyməti 69.90 AZN idi - indi isə qiymət 41.90 AZN-ə enib. Kişi paltoları 50% endirimdədir. Balonkalar 30% endirimdədir: 64 manatdan 45 manata düşüb.

    Mağazada satıcı işləyən Əzizə xanım bizi qadın geyim qiymətləri ilə tanış etdi. Onun sözlərinə görə, bəzi qadın köynəkləri ispan brendidir və 30 % endirimdədir. Satıcı bildirid ki, Avropada hansı qiymətə satılırsa,  bizdə də o qiymətədir, qiymət 45.90-dan 31 manata enib: "Qadın paltoları 129.90 AZN-dən 77.90-a, yun köynəklər 29.90-dan 20.90-a, jaketlər 22.90-dan 17.90-a, gödəkçələr 69.90-dan 29.90-a, balonkalar 44.90-dan 29.90-a, uzunboğaz qadın çəkmələri 74.90-dan 52.40  AZN-ə enib. Qış donları 44.90-dan 34.90-a, şalvarlar 44.90-dan 31.40-a, çantalar 44.90-dan 31.40 manata qədər endirilib. Əlcəklər və papaqların endirimli qiymətləri 9.90, şərflərin isə 3.90 AZN-dir”.

   "Mem” qadın geyimləri dükanında 50% endirim yazılmasına baxmayaraq burada sadəcə paltolar və çəkmələr endirimdədir. Sadə paltolar 300-360 AZN-dir və 50% endirimdədir.

    Mərkəzi bazarda yerləşən və  üzərində "nə alırsan al, yarısını ödə” yazılan "Ustop” kişi və qadın geyimləri mağazasında kişi gödəkçələri 158-dən 79 AZN-ə, yun köynəklər 58-dən 29-a, paltolar 34.90 manata endirilib. Qadın yun jaketləri 58-dən 29-a, jiletlər , köynəklər 39-dan 19.50-ə, əlcəklər 5-dən 3.50-ə, yun çantalar 62-dən 28 AZN-ə qədər endirimdədir. Papaqların endirimli qiymətləri 16-18, uzunboğaz çəkmələrinki isə 84 manatdır.

  Tez-tez endirimləri ilə alıcıları sevindirən "Avantaj” qadın geyimləri dükanında da qiymətlərə 50% bayram endirimləri olunub. Burada gödəkçələr 35-dən 17.50-ə, 50 AZN olanlar 25-ə, 40 AZN olanlar 20-ə, paltolar 35-dən 17.50-ə, yun köynəklər isə 25-dən 12.50 manata qədər endirilib.

   "Manas” kişi və qadın ayaqqabıları, aksesuarlarının satıldığı mağazada da "nə alırsan al yarısını ödə” prinsipi ilə qış endirimləri edilib. Burada qadın papaqlarına 28-dən 14-ə, əlcək və şərflərə 22-dən 11-ə, çəkmələrə 118-dən 44-ə, ayaqqabılara 164-dən 82-ə, çantalara isə 108-dən 54 AZN-ə qədər endirim edilib. Kişi dəri gödəkçələri 112-dən 33-ə, şərflər 28-dən 14-ə, botiklər isə 156-dan 78 manata qədər düşüb.

   "Forte Fashion” geyim mağazasında isə bəzi məhsullara 20-50% bayram endirimləri edilib. Burada qadın yun köynəkləri 44-dən 33-ə, jaketlər 17-dən 13-ə, balonkalar 55-ə, paltolar 96 AZN-ə qədər endirilib.

     "Şərq bazarı” ilə üzbəüz yerləşən "Dünya Moda” qadın və kişi geyimləri satılan dükanda 50% bayram endirimi olsa da, qiymətlər yenə də bahadır. Və hiss olunur ki, burada alıcı qıtlığı yaşanır.

  Brend mağazalardan fərqli olaraq "Cavid Mall” da bayram endirimləri olmur, üstəgəl malı deyilən qiymətdən aşağı qiymətə endirib almaq da olur. Burada kişi balonkaları 25-35 arasında, qadın balonkaları isə 30-40 AZN arasında dəyişir. Kişi və qadın papaqları 5, şərflər 3-6, əlcəklər 2-4 manatadır. Qadın botik və çəkmələri 15-50, paltoları isə  50-150 AZN-dir.

   Şəhərimizin sakinləri arasında aparılan sorğuda respondentlərin bir qismi brend mağazaların geyimlərini almaq istədiyini, lakin qiymətlərin bahalığı ucbatından endirim vaxtlarını gözlədiklərini, yaxud da kredit kartları ilə alış-veriş etdiklərini bildiriblər. Bir qisim isə geyimlərin markasına deyil ucuz, keyfiyyətli və davamlı olmasına üstünlük verir. "Ucuz ətin şorbası olmaz” deyib atalarımız. Ancaq bu deyim bahalı malın mütləq mənada keyfiyyətli olacağına da zəmanət vermir. Deməliyik ki, şəhər əhalisinin az bir qismi brend geyimlərə üstünlük verir. Amma dükan sahibləri və satıcılar ilin hər vaxtı alıcı baxımından korluq çəkmədiklərini bildirirlər. (168saat.com)