Xeberle.com-a verilən məlumata görə. tədbirdə YAP Sumqayıt şəhər təşkilatının sədri Ramiz Hüseynov, Azərbaycan Respublikasının Milli Məclisinin Deputatı, Milli Məclisin Elm və təhsil, Səhiyyə komitələrinin üzvü, Yeni Azərbaycan Partiyası Sumqayıt şəhər təşkiklatının Şura üzvü Müşfiq Məmmədli, şəhər təşkilatının İdarə heyəti və Şura üzvləri, Gənclər birliyinin üzvləri, ərazi ilk partiya təşkilatlarının sədrləri və siyasi fəallar iştirak edirdilər.

Tədbiri giriş nitqi ilə açan YAP Sumqayıt şəhər təşkilatının sədri Ramiz Hüseynov tədbir iştirakçılarını salamladı və tarixə, siyasi proseslərə nəzər salaraq qeyd etdi ki, Azərbaycanın XXI əsrdə qazandığı möhtəşəm uğurlar İlham Əliyevin adı ilə bağlıdır. Onun strategiyası və fədəkarlığı sayəsində Azərbaycan dünyanın ən uğurlu gənc dövləti imicini qazanıb. Cənab İlham Əliyevin həyata keçirdiyi siyasətin ölkəmizin müasirləşməsini, respublikamızın simasının əsaslı dərəcədə dəyişməsini təmin etdiyini – söyləyən sədr qeyd etdi ki, bu gün Azərbaycanın müxtəlif sahələrdə təcrübəsi hətta inkişaf etmiş ölkələr üçün nümunə göstərilir. Beləliklə, ötən 17 il ərzində Prezident İlham Əliyevin rəhbərliyi ilə Azərbaycanda böyük inkişaf yolu keçildiyini, bütün sahələrdə böyük nailiyyətlər əldə edildiyini bildirən sədr qeyd etdi ki, bu gün 44 gün davam edən Vətən müharibəsində qazanılmış tarixi qələbəmizin həlledici amili ölkə Prezidenti, Ali Baş Komandan İlham Əliyevin adı ilə bağlıdır.Azərbaycanın Vətən müharibəsində qazandığı zəfər tariximizin ən mühüm hadisələrindən biri və bəlkə də birincisi olduğunu qeyd edən sədr vurğuladı ki, dövlət, xalq və ordu o zaman güclü olur ki, ona güclü lider rəhbərlik edir. Bu mənada, bu gün Azərbaycan xalqının böyük qürur hissi ilə qeyd etdiyi Qələbəmizin baş qəhrəmanı Müzəffər Ali Baş Komandan, Prezident İlham Əliyevdir. Bütün bunların nəticəsidir ki, Azərbaycan xalqı Prezident İlham Əliyevin ətrafında dəmir yumruq kimi sıx birləşib. Xalq-iqtidar birliyi, güclü milli həmrəylik isə ölkəmizin bundan sonra da Prezident İlham Əliyevin rəhbərliyi ilə uğurla inkişaf edəcəyini əminliklə söyləməyə imkan verir. Sədr qeyd etdi ki, heç şübhəsiz, Azərbaycan bu Qələbəni qazanmaqla öz tarixinin qızıl səhifəsini, şərəf və ləyaqət səhifəsini yazdı.

Konfransın əlamətdar bir gündə keçirildiyini qeyd eden Ramiz Hüseynov bildirdi ki, 24 dekabr Prezident İlham Əliyevin doğum günüdür. Bu münasibətlə YAP Sumqayıt şəhər təşkilatının çoxminli üzvləri adından Prezident İlham Əliyevi təbrik edən sədr dövlət başçısına cansağlığı, uzun ömür, çətin və şərəfli fəaliyyətində yeni-yeni uğurlar arzuladı və Ali Baş Komandanın müzəffər əsgəri kimi Böyük Quruculuq səngərində onun hər bir kəlmənizi gerçəyə çevirməyə hazır olduqlarını bildirdi. Daha sonra Ramiz Hüseynov sözü məruzəçilərə verdi.

Millət vəkili Müşfiq Məmmədli "Azərbaycan tarixinə Şərəf, Ləyaqət, Qürur səhifəsi yazan Ali Baş Komandan - İlham Əliyev” mövzusunda məruzə ilə cıxış edərək qeyd etdi ki, tarixi hər zaman misilsiz və müqayisəsiz üstün fərqli keyfiyyətləri özündə cəm edən tarixi şəxsiyyətlər və sərkərdələr yazıb. Bu gün Ali Baş Komandan İlham Əliyev dövlətçiliyimizin ən şərəfli səhifələrindən birini yazdı.Vətən müharibəsində qazanılan Böyük Qələbə Azərbaycan Prezidentinin Qarabağ uğrunda zəfər salnaməsi, parlaq səhifəsidir - söyləyən millət vəkili qeyd etdi ki, bu zəfər Ali Baş Komandan İlham Əliyevin Qələbə əzminin, sarsılmaz iradəsinin, qətiyyətli praqmatik siyasətinin, hərbi-sərkərdəlik məharətinin qanunauyğun nəticəsidir. Böyük Qələbə Prezident İlham Əliyevin simasında Azərbaycanda yaranmış dəmir yumruq kimi möhkəm xalq-iqtidar birliyinin həlledici uğurudur, İlham Əliyevin müdrik siyasəti nəticəsində hər cəhətdən inkişaf etmiş müstəqil Azərbaycan dövlətinin qələbəsidir. İnanırıq ki, Prezident İlham Əliyevin rəhbərliyi ilə Azərbaycanın qarşıdakı illərdə də dinamik inkişafı davam edəcək, işğaldan azad olunmuş torpaqlaımız çiçəklənəcək.

Çıxışının sonunda Müşfiq Məmmədli bu mübarizədən şərəf və ləyaqətlə çıxan xalqımızın bu qələbəyə görə Ali Baş Komandanımıza minnətdar olduğunu bildirdi.

Tədbirdə həmçinin, Yeni Azərbaycan Partiyası Sumqayıt şəhər təşkilatının Şura üzvü, SDU nəzdində Sumqayıt Dövlət Texniki Kollecinin direktoru Mətanət Pirquliyeva "Prezident İlham Əliyevin fəaliyyəti Ulu Öndər Heydər Əliyevin siyasi kursunun uğurlu davamıdır” mövzusunda məruzə etdi. Mətanət Pirquliyeva qeyd etdi ki, Son 17 ildə Azərbaycanın daxili və xarici siyasətdə qazandığı uğurlar bir daha sübut etdi ki, ümummilli lider Heydər Əliyevin siyasi kursu və Azərbaycan dövlətçiliyi etibarlı əllərdədir. Ümummilli lider Heydər Əliyevin başladığı və hal-hazırda cənab Prezident İlham Əliyev tərəfindən çox uğurla davam etdirilən siyasi kurs, sosial və iqtisadi inkişaf yolu Azərbaycan xalqının seçimidir. Bu inkişaf yolu xalqımızın mənafeyinə, onun inamlı sabahına, işıqlı gələcəyinə xidmət edir. Bu inkişaf modeli Azərbaycan Respublikasını demokratik, hüquqi, dünyəvi dövlət kimi möhkəmləndirən Azərbaycan xalqını xoş gələcəyə aparan nurlu yoldur. Azərbaycan Respublikasının Prezidenti İlham Əliyev ümummilli lider Heydər Əliyevin ideyalarını və qurub-yaratdıqlarını nəinki inkişaf etdirir, eyni zamanda, bu işləri müasir dövrün tələblərinə, xalqın maraqlarına uyğun yeni formada təkmilləşdirir və daha da irəliyə aparır söyləyən Mətanət Pirquliyeva bildirdi ki, 17 il ərzində Azərbaycan çox uğurlara imza atıb. Onların ən möhtəşəmi Vətən müharibəsindəki böyük Qələbədir.

Daha sonra Sumqayıt Dövlət Universitetinin İqtisadiyyat və idarəetmə fakültəsinin Dünya iqtisadiyyatı və marketinq kafedrasının professoru Şəfa Əliyev "Müstəqil daxili və xarici siyasi-iqtisadi inkişafın Azərbaycan Modeli. Vətəndaşların sosial problemlərinin həllinin priorotetliyi” Yeni Azərbaycan Partiyası Sumqayıt şəhər təşkilatının nəzdində Gənclərlə iş komissiyalarının koordinatoru Ramil Fərəcli "Prezident İlham Əliyevin şərəfli tarix ənənələrə söykənən siyasi fəaliyyəti” və Yeni Azərbaycan Partiyası Sumqayıt şəhər təşkilatının fəalı Tural Əlibabayev "Güclü və müasir ordu quruculuğu Vətən Müharibəsində böyük zəfər qazanılması və ərazi bütovlüyünün təmin edilməsinin təməlidir” mövzularında məruzələr etdilər. Məruzələr ətrafında YAP Sumqayıt şəhər təşkilatının İdarə Heyətinin üzvü Orucəli Allahverdiyev və YAP Sumqayıt şəhər təşkilatının İdarə Heyətinin üzvü, Prezident təqaüdçüsü Təbrik Quliyev maraqlı çıxışlar etdilər.

Sonda YAP Sumqayıt şəhər təşkilatının sədri Ramiz Hüseynov tədbir iştirakçılarına təşəkkürlərini bildirdi və tədbirə yekun vurdu.