27 sentyabr 2020-ci il tarixdə başlayan Vətən müharibəsində Azərbaycan özünün hərbi-siyasi tarixinin növbəti şanlı səhifəsini yazdı. Bu elə bir tarixdir ki, Ermənistanın işğal etdiyi torpaqlarımızı Müzəffər Azərbaycan Ordusu 44 gün ərzində işğaldan azad edərək Ermənistan silahlı qüvvələrinin "məğlubedilməzliyi haqqında mifi” darmadağın etdi və dövlətimizin gücünü və potensialını dünyaya göstərdi. Bütün bunlar Azərbaycan Respublikasının Prezidenti, Ali Baş Komandan cənab İlham Əliyevin apardığı uğurlu daxili və xarici siyasəti nəticəsində mümkün oldu.  Bu qələbə həm döyüş meydanında, həm də siyasi arenada qazanılmış qalibiyyətdir. Bununla təkcə uzun illərdən bəri düşmən tapdağı altında qalmış torpaqlarımız işğaldan azad edilmədi, eyni zamanda Azərbaycan xalqının özünə inamı geri qaytarıldı, xalqın öz liderinə, onun gücünə etibarı daha da möhkəmləndi. 

Bütün bunlara biz ürəkləri vətən, yurd sevgisi ilə döyünən şəhidlərimizin canı, yüzlərlə qazilərimizin qanı, igid, qəhrəman oğullarımızın şücaəti, iradəsi, dözümü hesabına nail olduq.   

Şəhidlərimiz, qazilərimiz yaddaşlarda əbədi yaşayacaq, onların gələcək nəsillərin hafizəsindən silinməməsi, nəsillərdən-nəsillərə ötürülərək yaşadılması bizlərin ən birinci vəzifəsidir. 

Qubadlı Rayon Təhsil Şöbəsinin təşkilatçılığı ilə rayonun ümumi təhsil müəssisələrində mütəmadi olaraq onlayn tədbirlər həyata keçirilir. Qubadlı Rayon Təhsil Şöbəsinin müdiri və əməkdaşları Vətən müharibəsində yaralanmış məktəblərimizin məzunu olan döyüşçülərə baş çəkmiş, qaziləri düşmən üzərində qazanılan tarixi qələbə münasibətilə təbrik etmiş, onları vətənpərvər böyüdən valideynlərə minnətdarlıqlarını bildirmişlər. Bu sahədə tədbirlər davam etdirilməkdədir.

Rayonun ümumi təhsil müəssisələri II Qarabağ müharibəsində yaralanmış əsgər qazilərlə, şəhidlərin ailələri ilə şagirdlərin onlayn  görüşləri təşkil edilir. Görüşlərin keçirilməsində məqsəd Vətən müharibəsində şəhid olmuş, yaralanmış qəhrəmanların igidlik və şücaətini şagirdlərə tanıtmaq, onları vətənə məhəbbət ruhunda tərbiyə etməkdən ibarətdir. Qazilər müharibə ilə bağlı xatirələrdən, göstərdikləri igidliklərdən şagirdlərə bəhs edirlər. Eyni zamanda şagirdlərimiz şəhidlərin həyat yolunu əks etdirən videoçarxlar hazırlayır, onlara müxtəlif kompozisiyalar həsr edir, müəllimlərimiz də dərslərdə Vətən müharibəsi qəhrəmanlarını daim yad edirlər və etməyə də davam edəcəklər.

Artıq bizim gələcək nəsillərə anlatacağımız yeni və unudulmaz qəhrəmanlarımız var, hansı ki, neçə-neçə nağıllara, hekayələrə, mahnılara  çevrilərək dillər əzbəri olacaq. 

Şəhidlər bizim ürək ağrımız, kədərimiz olsa da, onlar həm də bizim fəxrimiz, birliyimiz, ölməzliyimiz, bütövlüyümüzdür. Onları unutmamaq isə bizim əbədi və əzəli borcumuzdur