Dünən Xeberle.com portalının təşəbbüsü ilə bir neçə gənc 1988-ci ilin fevralında baş verən Sumqayıt hadisələrini, son 26 ildə Azərbaycan və Ermənistan münaqişəsinin durumunu, ölkəmizin geosiyasi vəziyyətini müzakirə edib. Dəyirmi masa formatında keçən tədbirdə 1988-ci ildə rus-erməni birləşməsinin Sumqayıtda hazırladığı təxribatın indiyədək məlum olmayan tərəfləri haqda geniş danışılıb. Ekspert qismində ömrünün 26 ilini bu olayların araşdırılmasına həsr edən Respublikanın əməkdar jurnalisti, publisist Eyruz Məmmədov dəvət edilib. O, bu istiqamətdə Rusiyada apardıqları araşdırma, sorğu və müsahibələrin ən maraqlı təfərrüatlarından da söz açıb...
Tədbirə həmçinin müxtəlif sferalarda çalışan şəhərin bir neçə gənci də dəvət edilmişdi. Bu təşəbbüsdə əsas məqsəd bu hadisələrin əsas araşdırıcısı Eyruz Məmmədovun bu sahədəki biliklərinin həmin gənclərlə bölüşməsi, onların isə öz növbəsində bunu özlərindən daha kiçik həmşəhərlilərinə çatdırmaları idi. Tədbirdə bir daha gənc nəslə Sumqayıt hadisələrinin əsl mahiyyətini çatdırmaq, olayın əsl səbəbləri haqda məlumatları daha da yaymaq vurğulandı.

Xeberle.com