Ali Baş Komandan İlham Əliyevin rəhbərliyi ilə ikinci Qarabağ müharibəsində qazanılan möhtəşəm qələbə nəticəsində tarixi ədalətin bərpa edildiyini, bu savaşın haqq savaşı olduğunu, cəsur və mərd oğullarımızın məğrurluqla vuruşduğunu hər kəs izlədi.
Qubadlı Rayon Mədəniyyət İşçiləri Həmkarlar Komitəsinin təşəbbüsü ilə Vətən müharibəsinin şəhidi Ramil Elşən oğlu Quliyevin ailəsi ziyarət edilib.
Ramil Quliyev 1991-ci il 4 yanvar tarixində Qubadlı rayonunda anadan olub. 1997-ci ildə Sumqayıt şəhər 14 nömrəli tam orta məktəbin 1-ci sinifinə daxil olub. 2000-ci ildən isə təhsilini Sumqayıt şəhər 35 saylı tam orta məktəbdə davam etdirib və 2008-ci ildə həmin məktəbin məzunu olub. O, 2015-ci ildə Kiyevdə Personalın İdarəetməsinin Regionlararası Akademiyası (MAUP)-nın menicment fakultəsinin məzunu olub.
Hərbi xidmətdə olduğu müddətdə Lələtəpə uğrunda gedən döyüşlərdə iştirak edib və 2016-cı ilin iyul ayında hərbi xidmətini başa çatdırır.
29 sentyabr Ramil də bir çox oğullarımız kimi, torpaqlarımızın ərazi bütövlüyünün bərpası üçün müharibəyə yollanıb.
Əsgər yoldaşları onun haqqında fikirlər səsləndirərkən qeyd ediblər ki, Ramil müharibədə rəşadətlə vuruşub. Hadrut uğrunda gedən döyüşlərdə verilən tapşırığı yerinə yetirərkən düşmənin snayper gülləsi ilə vurularaq qəhrəmancasına şəhid olub.
Xəstə anası Ramilin şəhid xəbərini eşidəndən sonra gündən-günə halı ağırlaşmağa başlayıb və Ramilin şəhadətə qovuşduğu məqamdan sonra cəmi 20 gün yaşayaraq, Noyabr ayının 10-u qələbə xəbərini eşidəndən bir neçə saat sonra dünyasını dəyişib.
Şəhidin ailə üzvləri Ramil və onun kimi minlərlə digər Azərbaycan igidləri ilə fəxr edirlər.
Xəbərdən istifadə edərkən istinad etmək vacibdir.
