Elə bir kitab həvəskarı yoxdur ki, yolu Sumqayıta düşəndə Xan Rəsulovun kitab mağazasına baş çəkməsin. Bu yaxınlarda isə onun Bakıda kitab dükanı açdığını eşitdik və "Elmlər Akademiyası" metrosunun iki addımlığında yerləşən "Xan xəzinəsi" kitab mağazasında görüşdük. 

Mağazanın qapıları oxucuların üzünə açıq olsa da, yerləşmə işləri davam edirdi. Xan Rəsulov hələ tam gücü ilə fəaliyyətə başlamadıqlarını, qısa müddət ərzində yerləşmə məsələsini həll edəcəklərini dedi. 

Söhbət zamanı o, yeni kitab mağazasının ideyasından da danışdı: "İllərdir ki, Sumqayıtda kitab satışı ilə məşğul olurdum. Artıq qərara gəldim ki, Bakıda da belə bir mağaza açım. Həftənin iki günü Sumqayıtda, qalan günləri də burda olacağam. Amma hər iki mağazamızda satıcı işləyəcək. 

"Xan xəzinəsi"ndə bir çox yeniliklər olacaq. Daha çox köhnə kitablar satacağıq. Çünki bir çox dəyərli kitablarımız var ki, onlar məhv olmaq üzrədir. Onları qoruyub-saxlamaq istəyirəm. Buna görə də Şahbaz Xuduoğluna, Rasim Qaracaya məsləhət vermişdim ki, bəzi kitabları təkrar çap etsinlər. Onlar da sağ olsunlar, bu kitabların bir çoxunu nəşr etdilər. 

Bundan başqa, istəyirəm kitabları 20-30 qəpiyə satım. Bilirsiniz ki, indi qəzetin özü belə 40 qəpikdir. Bizim kitab mağazamızdan oxucular dünya ədəbiyyatından müxtəlif əsərləri 20-30 qəpiyə ala biləcəklər. Kitabları qəzetdən belə ucuz qiymətə satmaq istəyirəm ki, hər kəs oxusun. Əsas işlərimdən biri də tələbələrə şərait yaratmaq olacaq. 

Bahalı tədris kitablarını bizdən kirayə götürə biləcəklər. Bir də sizin vasitənizlə internatlara, qocalar evinə, həbsxanalara müraciət etmək istəyirəm ki, kim istəyirsə, mən onlara minlərlə nüsxə pulsuz kitab hədiyyə edə bilərəm. Qoy onlar da bu müəssisələrdə öz kitabxanalarını yaratsınlar".

İllərdir kitablar arasında olan Xan Rəsulovla bir az da müasir ədəbiyyatımızdan söhbət etdik. O, altı minə yaxın kitab oxuduğunu dedi: "Düzü, heç kim inanmır, ancaq altı minə yaxın kitab oxumuşam. Ədəbiyyatdan, fəlsəfədən geniş şəkildə anlayışım var. "Ən yaxşı roman", "Ən yaxşı əsər" tipli müsabiqələr keçirilir. Ancaq bunlar hamısı subyektivdir. Məsələn, mən bir zamanlar İsa Muğannanın "Məhşər" romanını ən yaxşı hesab edirdim. Ancaq ideoloji basqılar olmasaydı, bizim bir çox yazıçımız "Nobel"ə layiq olardı. İndinin özündə də gənc yazarlarımız var ki, onlar gündəlik qayğılardan uzaq olsalar, çox gözəl əsərlər yaradardılar". 

Bu qədər kitabın içində olan, kitablarla nəfəs alan Xan Rəsulov özü də kitab yazır: "Mən bu yaxınlarda öz imkanıma şeirlər kitabımı çap etdirdim. Bundan başqa, bir neçə kitablıq materialım da var. Vaxtaşırı hamısını çap etdirəcəyəm. 

Əsasən kəlamlar kitabı buraxmaq istəyirəm. Öz hesabıma dünya ədəbiyyatı nümunələrindən də çap etdirirəm. Məsələn, Alber Kamyunun  "Kaliqula" əsərini çap etdirdim. Oxuduğum, təsirləndiyim kitabları çap etdirməyə çalışıram".

Xan Rəsulovla söhbəti bitirib sağollaşırıq. O, bizə "Vətəndəki ömrümüz" adlı kitabını hədiyyə edir. "Xan xəzinəsi"ndən öz payımızı götürüb redaksiyaya yollanırıq.