Ölkəmizdə
COVID-19 virusuna ilk yoluxma halı qeyd olunan andan effektiv və
təxirəsalınmaz tədbirlər görülməkdədir. Dövlətimiz istər insanların
sağlamlığının və təhlükəsizliyinin təmin edilməsi, istərsə də
koronavirus xəstələrinin müalicəsi, səhiyyə infrastrukturunun
təkmilləşdirilməsi, yeni xəstəxanaların açılması və tibb müəssisələrinin
texniki təchizatı baxımından bütün məsələləri uğurla həll edib. Eləcə
də bu virusa qarşı vaksinasiyanın təşkili istiqamətində mühüm addımlar
atılıb. Belə ki, Nazirlər Kabinetinin 2021-ci il 16 yanvar tarixli
Sərəncamı ilə "Azərbaycan Respublikasında COVID-19 xəstəliyi əleyhinə
2021-2022-ci illər üçün Vaksinasiya Strategiyası” qəbul olunub.
Ümumiyyətlə, Azərbaycanda COVID-19 pandemiyasına qarşı mübarizə planlı
şəkildə aparılır və dövlətimiz əhalinin sağlamlığının qorunmasını özünün
strateji vəzifəsi hesab edir.
Xeberle.com xəbər verir ki, bu fikirləri AZƏRTAC–a Milli Məclisin Səhiyyə komitəsinin üzvü Müşfiq Məmmədli deyib.
Deputatın sözlərinə görə, qabaqlayıcı tədbirlər çərçivəsində ölkədə
xüsusi laboratoriyalar yaradılır və onların sayı 20-dən çoxdur.
Ölkəmizin yüksək səviyyədə təchiz edilmiş xəstəxanaları koronavirus
xəstələrini müalicə etmək üçün ayrılıb. Azərbaycan dünya miqyasında
nadir ölkələrdəndir ki, COVID-19 virusuna yoluxan xəstələrin mütləq
əksəriyyəti tibb müəssisələrində müalicə alırlar: "Təəssüflər olsun ki,
indiki halda karantin rejiminin yumşaldılması və qadağaların
götürülməsi, açıq havada maska rejiminin ləğvi, restoran və ticarət
obyektlərinin, metronun açılması, şənlik mərasimlərində qaydalara riayət
olunmaması, tətil mövsümü və xaricə gediş-gəlişin artması virusun daha
geniş yayılmasına və yoluxma sayının kəskin artmasına səbəb olur.
Vətəndaşlarda arxayınlığın yaranması, gigiyena və təhlükəsizlik
qaydalarına əməl edilməməsi, gündəlik həyatda bu qaydaların pozulması
hallarının artması yoluxma sayında yüksək dinamikanın müşahidə
olunmasına yol açmaqdadır. Nəticə etibarilə, xəstəxanalara müraciət
edənlər kimi, ağır vəziyyətdə reanimasiyaya yerləşdirilənlərin, habelə
ölüm hallarının sayında da ciddi artım nəzərə çarpır”.
O, artıq dünyanın bir sıra ölkələrində müəyyən sərtləşdirmə
tədbirlərinə əl atıldığını qeyd edərək, məhdudiyyətlərin ölkəmizdə də
tətbiq edilməməsi üçün vətəndaşlarımız mütləq şəkildə məsuliyyətli
davranmalı və karantin rejiminin qaydalarına riayət etməli, vaksinasiya
prosesinə daha fəal qoşulmalı, qapalı məkanlarda tibbi maskadan istifadə
etməli, ara məsafəsi saxlamalı olduqlarının vacibliyini vurğulayıb.
"Sosial mədəniyyət və sosial məsuliyyət insanlar arasında münasibətlərin
əsasını təşkil etməlidir. Əks halda, yoluxma sayının artım dinamikası
daha da yüksələrək ciddi təhlükə yaratmaqda davam edəcək”, - deyə Müşfiq
Məmmədli bildirib.
Xəbərdən istifadə edərkən istinad etmək vacibdir.
