Sumqayıtlı "Vətən Müharibəsi Qəhrəmanı” şəhidi baş-leytenanta həsr olunmuş xatirə tədbiri keçirilib. Bu haqda Müdafiə Nazirliyinin saytında bildirilib.
Şəhid Adil İbrahimliyə həsr olunmuş mərasimdə şəhidin ailə üzvləri, Milli Məclisin, Müdafiə Nazirliyinin, Xəzər və Ağdam rayon icra hakimiyyətlərinin rəsmiləri, qazilər, ictimaiyyət nümayəndələri iştirak ediblər. Onlar İkinci Şəhidlər xiyabanını ziyarət edərək, şəhid məzarlarının önünə əklil, çələnglər qoyublar. Şəhidin xatirəsi bir dəqiqəlik sükutla yad edilib.
İbrahimli 7 noyabr tarixində Şuşa döyüşləri zamanı şəhid olmuşdur. O, Murovdağ döyüşlərində, həmçinin Cəbrayılın, Füzulinin, Xocavəndin və Şuşanın azadlığı uğrunda gedən döyüşlərdə savaşıb.
Prezidentin sərəncamı ilə Adil ölümündən sonra "Vətən Müharibəsi Qəhrəmanı”, "Vətən uğrunda”, "Şuşanın azad olunmasına görə” və "Kəlbəcərin azad olunmasına görə” medalları ilə təltif olunmuşdur.
Xəbərdən istifadə edərkən istinad etmək vacibdir.
