Son illərdə Sumqayıt şəhərində inşa olunan bəzi çoxmərtəbəli binalar müasir görkəmi ilə göz oxşayır. Ancaq binalarda müəyyən mövcud problemlər sakinlər üçün ciddi problemə çevrilib. Hətta həmin problemlərdən bəziləri estetik baxımından şəhərin ümumi mənzərəsinə belə xələl gətirir. Bunlardan biri də paltarları yuduqdan sonra onların asılması üçün yerlərin olmamasıdır.
İlk əvvəl burada bir məqamı qeyd edək ki, bəzi evlərdə paltaryuyan avtomat maşınlar var ki, həm paltarı yuyur, həm də qurudur. Amma belə maşınlar hər evdə yoxdur. Digər tərəfdən o da həqiqətdir ki, sözügedən modern maşınlar da paltarı tamamilə qurutmur, nəm saxlayır. Yəni onu da təzədən havaya sərmək lazım gəlir. Çoxmərtəbəli binalarda isə yuyulmuş paltarlar adətən eyvanlardan asılır. Bu isə kənardan baxanda estetik mənzərəni ciddi şəkildə korlayır. Sumqayıt şəhər 12 saylı Mənzil istismar sahəsinin rəisi Fərhad Camalov deyir ki, mövcud problem şəhərin bütün istiqamətlərində yaşayış olan binalarda hökm sürür. Bununla bağlı Sumqayıt şəhər rəhbərliyinin tapşırığına əsasən həmin binada yaşayan sakinlərə hətta xəbərdarlıq da edilib. Binaların fasadlarının qorunması, ya da paltarların eyvanda asılmaması üçün yuxarı instansiyadan hansısa sərəncam verilməsinə ehtiyac görməyən sakinlər bildirdilər ki, məsələnin kökündən həll olunması üçün əvvəlcə sakinlər üçün şərait yaradılmalıdır. Yoxsa bu mümkün deyil. Sakinlərin də dediyi kimi, bəs görəsən yuyulmuş paltarlar qurudulması üçün haradan asılmalıdır ki, binanın estetik görnüşünü pozmasın? Mənzil istismar sahəsinin rəisi buna da aydınlıq gətirdi. Xatırladaq ki, bir sıra xarici ölkələrdə, eləcə də keçmiş Sovet İttifaqına daxil olan bir çox ölkələrdə binaların görünən hissələrində paltar asmaq qadağan edilib. Azərbaycanda isə rəsmi şəkildə belə bir qadağa yoxdu. Yalnız Naxçıvan və Sumqayıt şəhərlərində həmin təcrübə tətbiq olunur. Bu işə mənzil istismar sahələri nəzarət edir.

Xeberle.com