Bakı-Sumqayıt istiqamətində yaranan tıxacların aradan qaldırılması üçün yolların tikintisi davam edir. Artıq qurulan yeni yolların bir hissəsi bitmək üzrədir. Bu, Sumqayıt-Bakı istiqamətində hərəkət edən sürücülər üçün xoş xəbər olsa da, yolların çəkilməsinə ürəkdən sevinməyən vətəndaşlar da var. Binəqədi rayounun “Motodrom” massivinin sakinləri yolların çəkilməsini məqsədəuyğun sayır, lakin evlərinin qarşısında tikilən istinad divarları, yeni çəkilən yollara birləşəcək köməkçi yolların olmaması və yolüstü piyada keçidlərinin quraşdırılmaması sakinlərin həyat tərzini iflic edir.
Sakinlərin sözlərinə görə, yollarda aparılan təmir və quruculuq işləri evlərdə çatlar yaradıb. Məktəblilər isə, qaz borularının üstü ilə məktəbə gedib-gəlirlər. Vətəndaşlar “Azəryolservis”dən xahişi budur ki, bura ilk əvvəl yolüstü piyada keçidi qoysunlar. Sakinlər hətta təklif edir ki, həyətlərindən yolboyu iki-üç metr sahə də verə bilərlər. Təki evlərinin qarşısında köməkçi yol çəksinlər. Çünki avtomobilləri olan sakinlər maşınlarını həyətlərinə sürə bilmir. Xəstənin halı pisləşəndə isə təcili tibbi yardım maşınları köməkçi yolun olmadığına görə əsas yolun kənarında qalır.
FaktXəbər olaraq, sakinlərin şikayəti ilə bağlı “Azəryolservis” ASC-nin mətbuat xidmətinin rəhbəri Pünhan Mürsəliyevdən münasibət öyrəndik. Pünhan Mürsəliyev bildirdi ki, Bakı-Sumqayıt istiqamətində hazırda üçzolaqlı yol çəkilir, köməkçi yol deyil. Hələlik işlər aparılır və torpaqtökmə işləri görülür. Yolüstü piyada keçidin olmamasına isə mətbuat rəhbəri belə cavab verdi: “Orada keçid var. Keçid 50 metrdən bir tikilmir.” Çəkiliş zamanı isə biz yolüstü piyada keçidini nə yaxında, nə də uzaqda gördük:
Xəbərdən istifadə edərkən istinad etmək vacibdir.
