Sumqayıt şəhər təcili tibbi yardım xəstəxanasının şöbə müdiri Hacı Cəfər Quliyev: "Deyirlər ki, guya Sumqayıtın "Yaşıl Bina”sındakı  sarmaşığın 50 illik ömrü var, sonra quruyur, ağ yalandır”

Mən yaşlı nəslin nümayəndəsi kimi üzümü bütün  sumqayıtlılara, ziyalılara, onun qurucularına üz tuturam. Gəlin Sumqayıtımızı gözəlləşdirək, abadlaşdıraq, onu yaşıllığa bürüyək. Bu istiqamətdə Sumqayıtda müsbət nə iş görülübsə, ona dəstək verməliyik.

Amma elə məsələlər var ki, onlara göz yummaq olmur. Hanı Sumqayıtın simvoluna çevrilmiş yaşıl binası?  Deyirlər ki, guya bu sarmaşığın 50 illik ömrü var, sonra quruyur. Ağ yalandır. Əgər bu, həqiqətdirsə, İngiltərədə, Avstriyada olan bir çox binaların yaşıl örtüyə bürünməsinin 100-200 yaşı var. Əsas diqqət və qulluq lazımdır. Biz isə bunları unutduq. Nəticədə gözəl binamızı itirdik.

Hanı Sumqayıtın zeytun bağları? Şəhər rəhbərliyinin, məmurların, yaşıllaşdırma idarəsinin, ekologiya ilə məşğul olan təşkilatların gözləri qarşısında qəddarcasına balta çalıb məhv edildi bizim zeytun ağaclarımız. Təkcə zeytun ağacları yox, bir sıra digər ağaclarımıza da amansız münasibət yarandı. Yerlərində çayxana, kafe, restoran tikildi. Bunlar üçün başqa torpaq sahəsi ayırmaq olmazdımı? Gərək, mütləq ağaclar kəsilməli idi?

Hanı bütün Sumqayıtın xiyabanlarını il boyu yaşıllığa bürümüş kolları? Dibindən çıxartdılar, yerinə İrandan sarı rəngdə guya dekorativ kollar gətirildi və əkildi. Hanı o kollar? Ömrü qısa oldu. Məgər bunları bizim başbilənlərimiz bilmirdi? Yaxşı bilirdilər. Çünki İrandan gətirilən kollar kimlərinsə gəlir mənbəyinə çevrilmişdir.

Mən həkiməm. Vəzifəm insanların sağlamlığı keşiyində dayanmaqdır. Əlimdən gələni edirəm. Şəhər ictimaiyyəti məni yaxşi tanıyır. Məqsədim özümü tərifləmək deyil. Ahil yaşımda əlimə qələm alıb məni və sumqayıtlıları düşündürən problemlərə toxunmağım və bir neçə şəhər ziyalısının bu məsələyə münasibət bildirməsi gənc jurnalistlərin Sumqayıtda məişət tullantıları poliqonundan reportaj aparmalı oldu. Əsas mətləbə keçməzdən əvvəl bir həkim kimi demək istəyirəm ki, son vaxtlar  "Bronxial astma”, "Qan təzyiqi”, "Beyinə qan sızma”, "Vərəm” "Ürək çatışmaması” və sair xəstəliklər artmaqdadır. Təəccüblü hal burasındadır ki, xəstəliklər cavanlar arasında çoxalıb. Qida məhsullarının  keyfiyyətsiz olması, atmosferə zərərli maddələrin atılması insan orqanizmində bir sıra fəsadlar əmələ gətirir. Əgər genofondumuzun sağlam olmasını istəyiriksə, bu haqda ciddi düşünməliyik.
Sovetlərin dövründə Sumqayıtı demək olar ki, zəhərləmişdilər. Sumqayıt SSRİ-nin kimya poliqonuna çevrilmişdi. 1990-ci ilin əvvəlləridə şəhərdə "Ekologiya” cəmiyyəti yaratdım. Cəmiyyətin az bir zamanda yüzlərlə üzvü oldu. Bizim təkidimizlə bir neçə zərərli sex və istehsalatlar bağlandı.

İndi artıq o müəssisələr daha yoxdur. Yaxşı, bəs bu nədir? Səhərlər çox vaxt nəfəs ala bilmirik. Sağ olsun bizim balalar. Gənc olmalarına baxmayaraq, onları Sumqayıtın təəssübkeşi adlandırmağa tam ixtiyarımız çatır. Niyə bu poliqon şəhər ətrafında yerləşməlidir? Axi, sənaye və məişət tullantılarını basdırmaq üçün poliqonlar adətən şəhərdən 25-30 kilometr aralıda tikilməlidir. Nədir, özümüz özümüzə düşmənik? Yuxarı təşkilatlar məgər bunu bilmirlər? Şəhəri dumana döndərmək, havasını çirkləndirmək olmaz! İnsanların sağlamlığını əlindən almaq olmaz! Əvvəllər bunu Moskvanın üstünə atırdıq. İndi kimin ütünə ataq? Bu günahdır! Millət qarşısında, Allah qarşısında! Yəni bu, bir o qədər böyük problem oldu ki, onun qarşısında aciz qaldıq?! İnanmıram. Təşəbbüs və qətiyyət lazımdır. Vəssalam!

Hacı Cəfər Quliyev,
"Şöhrət” ordenli, "Səhiyyə əlaçısı”
Sumqayıt şəhər təcili tibbi yardım xəstəxanasının şöbə müdiri 


Xeberle.com