Bu gün Heydər Əliyev Mərkəzində "Sabahın alimləri” IV respublika müsabiqəsinin açılış mərasimi keçirilib.

Tədbirdə təhsil naziri Mikayıl Cabbarov bildirib ki, müsabiqə hər il ABŞ-da 70-dən artıq ölkənin şagirdlərinin iştirakı ilə keçirilən Beynəlxalq Elm və Mühəndislik Sərgisi (İntel İsef) çərçivəsində təşkil olunur. Müsabiqədə Bakı və Sumqayıt şəhərlərində yerləşən ümumtəhsil məktəblərinin IX-XI sinif şagirdlərinin iştirak etdiyini deyən nazir qeyd edib ki, Təhsil Nazirliyi,Gənclər və İdman Nazirliyi, Heydər Əliyev Mərkəzi, Azərbaycan Təhsil İşçiləri Azad Həmkarlar İttifaqı Respublika Komitəsi tərəfindən təşkil olunan müsabiqəyə Bakı Dövlət Universiteti və Sumqayıt Dövlət Universiteti elmi dəstək verir: "Builki müsabiqədə 204 şagird 106 elmi layihə ilə iştirak edir. Onlardan 39-u fərdi, 67-si kollektiv layihədir. Müsabiqəyə Bakı şəhəri ilə yanaşı, ölkənin müxtəlif bölgələrinin ümumtəhsil məktəblərinin şagirdləri layihələr təqdim edib. "Sabahın alimləri” IV respublika müsabiqəsinin Azərbaycan gəncliyinin və təhsilinin inkişafına hər zaman xüsusi diqqət göstərən Heydər Əliyevin adını daşıyan mərkəzdə keçirilməsi təsadüfü deyil. Ölkədə təhsil islahatlarının həyata keçirilməsi, kadr və intellektual potensialının möhkəmləndirilməsi məhz Heydər Əliyevin adı ilə bağlıdır. Onun miras qoyduğu milli təhsil quruculuğu bu gün prezident İlham Əliyev və Heydər Əliyev Fondunun prezidenti Mehriban Əliyeva tərəfindən uğurla davam etdirilir. Elmsiz təhsil, təhsilsiz elmi təsəvvür etmək mümkün deyil. Müsabiqənin keçirilməsinin əsas məqsədi yuxarı sinif şagirdlərinə elmi təfəkkür tərzi və tədqiqatçılıq vərdişlərinin aşılanmasından ibarətdir. İnnovativ fikir yarışması olan bu müsabiqə gənclərə müxtəlif problemlərin elmi həll yollarını axtarıb tapmağa kömək edəcək”.

Azərbaycan Milli Elmlər Akademiyasının prezidenti Akif Əlizadə bildirib ki, bu müsabiqə elmə ildən-ilə böyük töhfələr verəcək. Azərbaycan elminin inkişafında "gənc alimlərin” yerinin göründüyünü deyən AMEA prezidenti vurğulayıb ki, ilin sonunda AMEA-nın 70 illiyini qeyd ediləcək. Onun sözlərinə görə, bu illər ərzində Azərbaycanda beynəlxalq səviyyədə tanınan alimlər yaşayıb və onların öz dəsti-xətti olub: "Əfsuslar olsun ki, bu gün bəzi elmi məktəblərin sayı azalıb, bəzilərinin çərçivəsi darlaşıb. Ancaq bəzi elmi mərkəzlər bu gün də inkişaf etməkdədir. Bizim əsas problemimiz kadr çatışmazlığı ilə bağlıdır. Gənclərin püxtələşmiş alimlərin yanında olması Azərbaycan elmi üçün böyük impulsdur. Bu gün Azərbaycan gənclərinə böyük etimad var. Akademiyanın qapıları gənclərin üzünə açıqdır”.

Gənclər və idman nazirinin müavini İntiqam Babayev bildirib ki, şagirdlərin beynəlxalq elm yarışlarında qazandıqları hər bir uğur bütövlükdə ölkə üçün əvəzsiz töhfədir: "Gənclər və İdman Nazirliyi artıq 4-cü ildir ki, bu müsabiqənin təşkilində iştirak edir. Qarşıda daha böyük məqsədlər durur və bunlardan biri yeni nəsil intellektual potensialı formalaşdırmaqdır. Siz gənclər ölkədə yaranan potensialdan istifadə edərək səylə oxumalısınız. Gənclərin elmə marağının artırılması istiqamətində nazirlik tərəfindən bir sıra layihələr həyata keçirilir. Siz bu layihələrə qoşulmaqla öz imkanlarınızı daha da artıra bilərsiniz”.

Heydər Əliyev Mərkəzi direktorunun birinci müavini Adil Kərimli bildirib ki, Heydər Əliyev mərkəzi yalnız memarlıq baxımında öz görünüşü ilə deyil, həm də çoxsaylı fəaliyyət istiqamətləri baxımından diqqət mərkəzindədir: "Bu gün Heydər Əliyev Mərkəzi elmin, təhsilin inkişafı ilə bağlı çoxsaylı layihələr həyata keçirir. Bu müsabiqənin açılış mərasimin Heydər Əliyev mərkəzində keçirilməsi təsadüfü saymayaq. Müasir dünyada hər bir ölkənin inkişafı elm, təhsillə ölçülür. Dövlətin uğurlu gələcəyi gənc nəslin intellektual potensialından asılıdır. Bugünkü gənc nəslin gələcək Azərbaycanı yüksəyə qaldıracağına inanırıq”. 

Onun sözlərinə görə, bu cür "Sabahın alimləri” kimi müsabiqələrin keçirilməsi məktəblilərin elmə marağının artırılması, onların istedad, bacarıq və elmi potensialının üzə çıxarılması baxımından mühüm əhəmiyyət kəsb edir. A.Kərimli "Sabahın alimləri müsabiqəsi qaliblərinin bu ilin mayında ABŞ-ın Pitsburq şəhərində keçiriləcək İntel İSEF sərgisində uğurla çıxış edəcəyinə inandığını deyib.

Tədbirin davamında Azərbaycan Təhsil İşçiləri Azad Həmkarlar İttifaqı Respublika Komitəsi sədrinin müavini Şaiq Əsgərov, İntel koorporasiyasının MDB ölkələri üzrə meneceri Tatyana Nanayeva çıxış edərək müsabiqənin şagirdlərin elmə və yeni biliklərə marağının artmasındakı rolunu qeyd edib, onlara uğurlar arzulayıb.

Qeyd edək ki, müsabiqə üç gün davam edəcək. Sonuncu gün "Açıq qapı” saatları keçiriləcək, şagird və müəllimlərə, həmçinin media nümayəndələrinə layihələrlə tanış olmaq imkanı yaradacaq. Müsabiqənin qaliblərinə təşkilatçılar tərəfindən diplom, medal, və mükafat təqdim olunacaq.  (apa.az)