Fevralın 24-də Sumqayıt Regional Mədəniyyət İdarəsinə tabe olan Əhməd Bakıxanov adına uşaq incəsənət məktəbi və Sumqayıt Dövlət Rəsm qalereyasının təşkilatçılığı ilə "Bir yurd vardı-Xocalı..." adlı sərgi təşkil olunub. Sərgidə Sumqayıt Regional Mədəniyyət İdarəsinin rəisi cənab Rəşad Əliyev çıxış edərək bildirib ki, biz Xocalı soyqırımının 30-cu ildönümü ərəfəsindəyik. Azərbaycan xalqının tarixinə 1992-ci il fevralın 25-dən 26-na keçən gecə Xocalı faciəsi kimi daxil olmuşdur. Ermənistan silahlı qüvvələri bütün beynəlxalq hüquq normalarına zidd olaraq, keçmiş sovet ordusunun Xankəndi şəhərində yerləşən 366-cı motoatıcı alayının şəxsi heyətinin iştirakı ilə yatan şəhərə hücum edərək azərbaycanlılara qarşı soyqırım aktını törətmişlər.
Bu hərbi təcavüz zamanı Xocalı ağır hərbi texnikadan şiddətli atəşlər nəticəsində darmadağın edilmiş, dinc sakinlərə amansızcasına divan tutulmuşdur. Bir neçə saat ərzində 613 soydaşımız, o cümlədən 106 qadın, 63 uşaq və 70 qoca xüsusi qəddarlıqla qətlə yetirilmiş, meyitlər üzərində təhqiredici hərəkətlərə yol verilmişdir. Həmin kütləvi qırğın həyata keçirilərkən 8 ailənin həyatına son qoyulmuş, 25 uşaq hər iki valideynindən, 130 uşaq isə valideynlərinin birindən məhrum edilmiş, 487 dinc Xocalı sakini ağır yaralanmış və 1275 nəfər girov götürülmüşdür. Girov götürülənlərdən 150 nəfərin taleyi indiyədək məlum deyil.
Vətən müharibəsinin gedişatında Ermənistanın Gəncəni, Bərdəni, digər şəhər və kəndlərimizi kütləvi məhvetmə imkanlarına malik ballistik və reaktiv raketlərlə, kasetli bombalarla hədəfə alması bir daha sübut etdi ki, zamanla metodlar dəyişsə də, mülki əhaliyə qarşı qanlı cinayətlər törətmək Ermənistan tərəfinin daim həyata keçirdiyi dövlət siyasətidir. 44 gün sürən döyüşlər nəticəsində rəşadətli Azərbaycan Ordusu müzəffər Ali Baş Komandan İlham Əliyevin rəhbərliyi ilə parlaq qələbə qazanaraq doğma torpaqlarımızı işğaldan azad etdi.
Xocalı soyqırımının tanıdılması, bu faciəni törədənlərin hüquqi müstəvidə cinayət məsuliyyətinə cəlb edilməsi və haqq səsimizin dünyaya çatdırılması məqsədi ilə Heydər Əliyev Fondunun vitse-prezidenti Leyla Əliyevanın təşəbbü ilə 2008-ci ildə "Xocalıya ədalət” beynəlxalq kampaniyasına start verildi.
Tarixi ədalətin bərqərar olması, bəşəriyyətə qarşı belə cinayətlərin təkrar olunmaması üçün Xocalı soyqırımına hüquqi qiymət verilməli və bu dəhşətli faciəni törədənlər öz layiqli cəzalarını almalıdırlar.
Xocalı faciəsinin Siz yeniyetmə və gənc rəssamlar tərəfindən incəsənət dili ilə öz əsərlərinizdə təsvir etməyinizin xüsusi əhəmiyyəti vardır. Tariximizdə yaşananları diqqətlə öyrənmək və onlardan dərs çıxarmaq bizim vətəndaşlıq borcumuzdur.
Biz heç vaxt Xocalı faciəsini unutmamalıyıq!
Sonra məktəbin "Rəssamlıq" şöbəsinin şagirdlərinin rəsm əsərləro nümayiş olunub. Tədbir "Fortepiano" və "XÇA" şöbəsinin müəllimlərinin ifalarında A.Rzayevin "Düşüncə", J.Villiamsın "Şindlerin siyahısı", H.Xanməmmədovun "Yenə o bağ olaydı", Vangelisin "Prelüd", E.Sabitoğlunun "Bu gecə", L.V.Bethovenin "Aylı sonata", H.Xanməmmədovun "Konsert", S.Rüstəmovun "Hardasan" əsərləri səsləndirilib.
Xəbərdən istifadə edərkən istinad etmək vacibdir.
