Avstriya Parlamentinin birinci vitse-spikeri Karlheinz Kopf və bu ölkənin nüfuzlu şirkət rəhbərləri ilə Sumqayıtda, Azərbaycan Respublikası Dövlət Neft Şirkətinin "Azərikimya” İstehsalat Birliyində (İB) görüş keçirilib.
"Azərikimya” İB-dən bildirilib ki, görüşdə Birliyin Müşahidə Şurasının sədri, Milli Məclisin deputatı Muxtar Babayev Azərbaycan neft-kimya sənayesinin inkişafı, "Azərikimya”nın bir çox istehsalat sahələrində aparılan yenidənqurma işləri, o cümlədən sənaye zonasında yaradılan Sumqayıt Kimya Sənaye Parkı və buradakı müasir istehsalat sahələri barədə ətraflı məlumat verib, ölkələrimiz arasında iqtisadi münasibətlərin genişləndirilməsi istiqamətində görülən işlərdən danışıb.
K.Kopf Avstriya və Azərbaycan arasında qarşılıqlı faydalı əməkdaşlıqdan bəhs edərək, iqtisadi, sənaye, texnologiya, enerji və digər sahələrdə əlaqələrin genişləndirilməsi üçün yeni imkanların yarandığını bildirib.
Tərəflər əməkdaşlıq imkanlarının reallaşdırılması ilə bağlı məsələləri nəzərdən keçiriblər.  (azertag.az)