Yeni Azərbaycan Partiyası İdarə Heyətinin üzvü, Sumqayıt şəhər təşkilatının sədri Ramiz Hüseynov, aparatın əməkdaşları, partiya fəalları və Azərbaycan Bayrağı Ordenli qazi Zahir Həsənov Aprel döyüşlərinin ildönümü ilə əlaqədar olaraq Sumqayıt Şəhidlər Xiyabanını ziyarət ediblər. Şəhidlərin xatirəsi 1 dəqiqəlik sükutla yad olunub. Aprel döyüşlərinin qəhrəmanlarını və qazanılan zəfərdə böyük şücaətlər göstərmiş şəhidlərimizin məzarları ziyarət edilib və üzərlərinə gül dəstələri düzülüb, dualar oxunub.
Təşkilatın sədri Ramiz Hüseynov çıxış edərək bildirmişdir ki, Aprel döyüşləri bizim şanlı zəfərimizin ilk hərbi uğurudur, dövlətimizin, xalqımızın, ordumuzun gücünü göstərən qələbədir. 2016-cı il aprelin əvvəllərində Azərbaycanın ön xətt mövqeləri və yaşayış məntəqələri Ermənistan silahlı qüvvələri tərəfindən intensiv artilleriya atəşinə məruz qalanda ordumuzun bölmələri əks-həmlə ilə təxribatların qarşısını aldı. Bu tarixə Aprel döyüşləri kimi yazıldı. Döyüşlər Azərbaycan Ordusunun qələbəsi ilə nəticələndi. Tərtər rayonunun Talış kəndi ətrafındakı yüksəkliklər, Cəbrayıl rayonunun Lələtəpə yüksəkliyi və Cocuq Mərcanlı, Goranboy rayonunun Gülüstan kəndi və Tərtər rayonunun Suqovuşan kəndi istiqamətində bəzi mövqelər düşməndən azad olundu. Aprel döyüşləri nəticəsində Azərbaycan Silahlı Qüvvələri 2000 hektarlıq ərazini azad etmişdir. 2016-cı il aprelin 19-da Azərbaycan Respublikasının Prezidentinin müvafiq sərəncamları ilə Azərbaycan Silahlı Qüvvələrinin 3 üzvü "Azərbaycanın Milli Qəhrəmanı", 7 üzvü "Azərbaycan Bayrağı" ordeni, 1 üzvü 2-ci dərəcəli və 4 üzvü 3-cü dərəcəli "Vətənə xidmətə görə" ordeni, 19 üzvü "Vətən uğrunda" medalı, 43 üzvü "İgidliyə görə" medalı, 45 üzvü "Hərbi xidmətlərə görə" medalı, 2 üzvü "general-mayor" ali hərbi rütbəsi ilə mükafatlandırılıb.
Döyüşlər zamanı Sumqayıt şəhəri 5 şəhid verib. Şəhidlər Raquf İbrahim oğlu Orucov, Murad Vaqif oğlu Məmmədov, Şulan Bayram oğlu Bayramov, Əbdülməcid Nadirşah oğlu Axundov və Seymur Qulamşah oğlu Baxışovun əziz xatirələri hər zaman hörmətlə anılır!
Allah şəhidlərimizə rəhmət eləsin!
Xəbərdən istifadə edərkən istinad etmək vacibdir.
