Azərbaycanda ət məhsullarının qiymətinin kəskin şəkildə ucuzlaşması fermerlərin əlini işdən soyudub. Səbəb heyvan yemi olan yoncanın qış fəslində baha olması və fermerlərin kütləvi şəkildə heyvanları bazara çıxarmasıdır.
Bu sahədə hazırki vəziyyətin necə olması ilə maraqlanmaq üçün Sumqayıtda mal-qara satılan "Mərcan" bazarına baş çəkdik.
Bazarda əsasən xırdabuynuzlu heyvanlar və heyvan yemləri satılır. Başqa sahələrdən fərqli olaraq, bu bazarda canlanma müşahidə olunur. Fermerlər heyvanlarını baha qiymətə satmağa, alıcılar isə "qiymət öldürməyə" çalışırlar.
Yaxınlaşıb, bir neçə satıcı ilə söhbətləşirik. Satıcılar deyirlər ki, "Otu baha alıb, heyvanı bəsləyib, böyüdürük, satanda isə heyvanın hər kiloqramını bir bağlama otun qiymətinə satırıq”.
Son aylarda heyvanların qiymətinin ucuzlaşdığını deyən satıcı Əhəd Alışov bunu maldarlıqla məşğul olan fermerlərin üzləşdiyi problemlərlə əlaqələndirir.
Satıcının sözlərinə görə, ötən il olduğu kimi, bu ildə əhali mal-qarasını bazara çıxarıb, dəyər-dəyməzinə satır: "Heyvan yemlərinin, əsasən də otun baha olması fermerə, kəndliyə sərf eləmədiyi üçün qışda heyvanlarını satmaq məcburiyyətində qalırlar".
Bərdə rayonunda maldarlıqla məşğul olan və bazara heyvanlarını satmağa gətirən Zabil Qulamov isə deyir ki, heyvan yemi olmadığından təsərrüfatını genişləndirə bilmir. Müsahibimin sözlərinə görə, 15-20 baş mal-qaranın saxlanılması üçün bir günə 5 bağlama ot lazımdır, bu isə günə 25 manat, aya 750 manat xərc deməkdir. Heç bir fermerin sadəcə, ota bu qədər pul xərcləməyə imkanı yoxdur.
Ot satışı ilə məşğul olan satıcılar isə vəziyyətdən məmnundurlar. Onlar yayda yoncanın bir bağlamasını 1-1.5 manata alıb, qışda 4-5 manata satırlar.
Əhliman adlı satıcı bu işdən qazanclı çıxdığını deyir: "Yayda yoncanın bol vaxtında ucuz qiymətə alıb, qışda bazara çıxarıram”.
Daha ətraflı videodan izləyin.
Xəbərdən istifadə edərkən istinad etmək vacibdir.
