"Şeffild və Sumqayıt şəhərləri sakit olmalarına görə çox oxşardırlar”

Sumqayıtlı gənclər hər zaman öz savadı, intellekti ilə fərqlənib. Onların əksəriyyəti ölkəmizin müxtəlif universitetlərində təhsil alsalar da, bir qismi də dünyanın müxtəlif nüfuzlu universitetlərində təhsil alıb, yaxud almaqdadırlar. Onları tanımaq yəqin ki, bir çox oxucularımıza maraqlı olardı. Eyni zamanda bu tanıtım-müsahibələr sayəsində Sumqayıtın, yaxud ölkənin bir çox qurum və şirkətlərinin kadrlar şöbəsinin başbilənləri uğurlu seçimlər edə bilərlər. Beləliklə, "Xaricdə təhsil alan sumqayıtlılar" layihəsinin ilk qonağı Samir Hüseynovdur.
 

TANITIM
Mən Samir Hüseynov 9 sentyabr 1989-cu ildə Sumqayıtda ziyalı ailəsində anadan olmuşam. 1996-ci ildə 38 saylı məktəbin birinci sinfinə daxil olmuşam, 2004-cü ildən isə təhsilimi Sumqayıt şəhərindəki Texniki və Təbiət Elmləri Liseyində davam etdirmişəm. 2007-ci ildə Prezident yanında Dövlət İdarəçilik Akademiyasının Dövlət və Bələdiyyə İdarəetməsi ixtisasına qəbul olmuşam. Universitet illərində bir çox qeyri-hökümət təşkilatlarında, eləcə də Avropa Tələbələr Forumunun yerli nümayindələyində könüllü olaraq fəaliyyət göstərmişəm. Bu illər ərzində Avropanın bir çox şəhərlərində mühüm tədbir və konfranslarında iştirak edib ölkəmizi təmsil etmişəm. Akademiyada təhsilimi bitirdikdən sonra 2011-2012-ci tədris ilində Böyük Britaniyada Şeffild Universitetində siyasi elmlər fakültəsinin "Qloballaşma və İnkişaf" ixtisası üzrə magistr təhsili almışam.

- Bir az özün və oxuduğun universitet haqda məlumat verərdin.

Mən Samir Hüseynov, 2011-2012-ci tədris ilində Böyük Britaniyada Şeffild Universitetində "Qloballaşma və İnkişaf" ixtisası üzrə magistr təhsili almışam. Qeyd edim ki, Şeffild Universiteti dünyanın top-100 universiteti arasındadır, 2012-ci ildə Böyük Britaniyada ilin universiteti seçilmişdir, eləcə də siyasət üzrə elmi tədqiqatlara görə Oksford universitetindən sonra siyahıda ikincidir.

- Bu universitetin təlim-tərbiyə sistemində hansı özəlliklər var? Bizim təhsil sistemi ilə hansı oxşar, fərqli xüsusiyyətləri mövcuddur?

Doğrusu, bizim ənənəvi təhsil sistemiylə müqayisə eləməzdim, tam fərqlidir. Mühazirələrdə mövzu başa salınır, istiqamət verilir, tələbə özü araşdırır, tədqiq edir, öyrənir və nəticəni əldə edir. Əsas diqqət tələbənin özünü inkişaf etdirməsinə yönəlir. Hər hansı bir mühazirənin material-mətni öyrənilib danışılmır, mövzuya qoyulmuş suallar araşdırılır və nəticə təqdim olunur. Ən əsas üstün cəhət isə universitetin kitabxanalarındadır. Bəli, universitetin 1 deyil, 3 əsas kitabxanası var, biri 6 mərtəbəlidir hansı ki, həftənin 7 günü 24 saat fasiləsiz işləyir. Həmin kitabxanalarda olan İT avadanlıqlar tələbələrin işini xeyli asanlaşdırır. Bu, çox önəmli göstəricidir.

 - Şeffild şəhəri haqda, oranın insanları haqda söz açardın. Şeffild və Sumqayıtın şəhər kimi hansı oxşar və fərqli xüsusiyyətləri mövcuddur?

Şeffild İngiltərənin ən yaşıl şəhəri hesab olunur. Havadan asılı olmayaraq, çoxsaylı parklarında istirahət edən insanları görə bilərsiniz. Həmin insanların əksəriyyəti istirahəti təbiətdə kitab oxumaqda görürlər, eləcə də meditasiya edib yoqayla məşğul olanlar da var. Ümumiyyətlə ingilislər soyuqqanlıdırlar, lakin sizin nəsə probleminiz olsa, şəhərdə hər kəs imkan daxilində kömək etməyə çalışır. Mərkəzi küçədə qədim ingilis arxitekturası insanı valeh edir. Eyni zamanda müasirliyi ilə də şəhər fərqlənir. Qismən sakitliyi ilə tələbələr üçün ideal şəhər sayıla bilər. Şeffild və Sumqayıt şəhərləri sakit olmalarına görə çox oxşardırlar

- Universiteti bitirən kadrların taleyi necə olur? Onlar təcrübə və işlə nə dərəcədə təmin olunurlar?

Universitet daxilində Karyera Mərkəzi var, hansı ki, öyrəncilərə oxuduqları müddətdə də iş tapmaqda kömək edir. Universitetdə tez-tez iş sərgiləri keçirilir və Britaniyanın aparıcı şirkətləri buraya təşrif buyururlar. Elə olur ki, yerindəcə iş təklifi edirlər tələbəyə.

- Orada qalıb təhsilini davam etdirmək istərdinmi, yoxsa..?

Bizdə sovet dönəmindən qalma bir stereotip var, bütün təhsil dərəcələrini gərək arada fasilə vermədən qazanmalısan. Bu, əslində, yalnış yanaşmadır. Gərək həyatda istiqamətini, nə etmək istədiyini, kim olmaq istədiyini müəyyənləşdirəsən. Bir misal çəkim, İngiltərədə magistr təhsili alanların orta yaşı təxminən 26-27-dir. İngiliscədən tərcümədən "usta" mənasını verən master dərəcəsi seçdiyin peşənin ustası olmaqdır. Yəni sən bir işi görürsən, ixtisaslaşırsan, təcrübə qazanırsan və bunu dərindən öyrənmək üçün master edirsən. Bu baxımdan mənim üçün növbəti pillə olan PhD üçün tələsmirəm, hələ ki, növbəti beş ilimi təcrübə qazanmağa və özümü inkişaf etdirməyə həsr edəcəm. Sonrakı etapda isə PhD edəcəm.

- Şeffild Universitetində imtahanlar zamanı müəllimlərə "şirinlik", "tapşırıq" kimi üsullarla yola tapmaq olurmu?

Mən təhsilimin bakalavr pilləsini Prezident yanında Dövlət İdarəçilik Akademiyasında oxuduğumdan bu tip anlayışlarla tanış deyiləm. Şeffild universitetində müəllimlər yalnız öyrədir və tələbəyə istiqamət verir. Hər bir müəllimin isə həftədə iki dəfə ofis saatları olur, hansı ki tələbələrdə dərslərlə bağlı yaranan sualları izah etmək üçün nəzərdə tutulur. Bir sözlə, əllərindən gələni edirlər ki, tələbə öyrənsin, hər xırda detalı başa düşsün. Sizin dediyiniz üsulların bu tip universitetlərlə bir cümlədə belə işlənməsi mümkünsüzdür. 

- Orada xarici tələbələ münasibət necədir? Həm müəllimlər, həm də tələbələr tərəfindən. Azərbaycana münasibət haqda nə deyə bilərsən?

Dünyanın dörd bir tərəfindən tələbələr gəlir və sən özünü qərib adam hiss eləmirsən. İlk həftə üçün xüsusi proqram hazırlanmışdı, universitet və şəhəri tanımaq üçün, adaptasiya olmaq üçün çox yerinə düşmüşdü. Hər qrupda xeyli xarici tələbə olur, və eləcə də müəllimlər arasında. Münasibət tam normaldır və heç bir fərq qoyulmur. Xüsusilə beynəlxalq əlaqələr və bu kimi ixtisas üzrə təhsil alanlar ölkəmizi tanıyırlar və Azərbaycan şərqlə qərbin qovuşduğu müasir müsəlman dövləti olaraq maraq dairələrindədir. Azərbaycanlı tələbələrin təsis etdiyi Şeffild Azərbaycan Cəmiyyəti mütəmadi olaraq vətənimizin təbliğatı ilə məşğuldur, istər mədəniyyətimiz, istərsə də tariximizlə bağlı. Xüsusilə də Qarabağ münaqişəsi, Xocalı soyqırımı haqqında universitet tələbələrinin və şəhər sakinlərinin maarifləndirilməsi ilə ciddi məşğul olunur.

- Başına gələn maraqlı, qeyri-adi hadisələrdən danışa bilərsən?

Qeyri-adi deməzdim, lakin həyatımda vacib olan və deyərdim ki, dönüş nöqtəsi olan bir epizod olub təhsilimlə bağlı. İkinci kursun sonlarıydı, İsveçrədə beynəlxalq mədəni mübadilə proqramında könüllü olaraq iştirak edirdim. İştirakçıları evinə qonaq çağıran isveçrəli məndən hardan olduğumu soruşdu, cavabı eşidəndə isə buranın Afrikada bir səhra olub-olmadığını xəbər aldı. Dərhal ölkəmiz haqqında ətraflı məlumat verdim, sonunda isə onun "Bakı açıq səma altında muzeydir" deməsinə - etirafına nail oldum. Amma bu hadisə gələcək fəaliyyət istiqamətimi dəyişməyimə səbəb oldu. Mənim bakalavr ixtisasım iqtisadiyyat yönümlü idi, magistr isə siyasi elmlər fakültəsində "Qloballaşma və İnkişaf" ixtisası oldu. Bir sözlə, İsveçrəlinin sualı həyatımı dəyişdi.

- Daha nə haqda danışa bilərsən oxucularımıza. Nə haqda məlumat vermək istərdin?

Əsas məsələ nə istədiyini, kim olmaq istədiyini anlamaqdır. Həyatda öz yolunu tapmaq, özünü dərk etmək üçün ən önəmlifaktor təhsildir. Əlinizdə olan hər fürsətdən özünüzü inkişaf etdirmək naminə istifadə edin. Önəmli olanı isə özünüzə inanın,mümkünsüz heç nə yoxdur, məqsədinizin arxasınca gedin və qətiyyətli olun. Bu zaman uğur sizin yanınızda olacaq.

Söhbətləşdi: Elnur Ağayev
Xeberle.com