Sumqayıt Regional Mədəniyyət İdarəsinin Xızı rayon nümayəndəliyinin əməkdaşları Xızı rayonunun Sitalçay kəndindən olan şəhid Elnur Fəxrəddin oğlu Ağaəhmədov ailəsini ziyarət ediblər. Ziyarət zamanı Elnurun ailəsi ilə şəhidin döyüş yolu haqqında ətraflı söhbətlər aparılıb, onun qəhrəmanlıqlarından bəhs edilib, onların problemləri ilə maraqlanılıb. Sonra mədəniyyət işçiləri şəhidin məzarını ziyarət edib.
Azərbaycan Ordusunun kiçik giziri olan Elnur Ağaəhmədov 2020-ci il sentyabrın 27-də başlanan 44 günlük Vətən müharibəsində Füzulinin, Cəbrayılın və Xocavəndin azadlığı uğrunda gedən döyüşlərdə iştirak edib, oktyabrın 26-da Xocavənd döyüşləri zamanı Qırmızı Bazar istiqamətində qəhrəmancasına şəhid olub. Azərbaycanın ərazi bütövlüyünün təmin edilməsi uğrunda döyüş əməliyyatlarına qatılaraq, tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti cənab İlham Əliyevin Sərəncamına əsasən Elnur Ağaəhmədov ölümündən sonra "Vətən uğrunda", "İgidliyə görə", "Kəlbəcərin azad olunmasına görə", "Cəbrayılın azad olunmasına görə", "Xocavəndin azad olunmasına görə" medalları ilə təltif edilib.
Xəbərdən istifadə edərkən istinad etmək vacibdir.
