Ölkədə lisenziyası olmayan otellər gələn il Bakıda keçiriləcək Birinci Avropa oyunlarında qonaq qəbul edə bilməyəcəklər.

Belə ki, Fövqəladə Hallar Nazirliyi bu məsələ ilə bağlı ciddi monitorinqlərə start verib. Bu barədə məlumatı mədəniyyət və turizm naziri Əbülfəs Qarayev verib:

“Bunun nəticəsi olaraq otellərdə göstərilən xidmətin bütün müvafiq normalara, standartlara uyğun olması və əsasən də təhlükəsizlik normalarına riayət edilməsi yoxlanılır”.

Nazirin sözlərinə görə, qanunu pozan sahibkarlar cəzalandırılacaq və onların lisenziyaları ləğv ediləcək. 

Əbülfəs Qarayev Azərbaycanda turizm infrastrukturunun ucuz istirahət məkanı axtaran qonaqlar üçün əlverişsiz olduğunu da qeyd edib:

“Hətta yerli turistlər belə istirahət üçün məkan axtararkən mehmanxanalarda yaradılan şəraitə, sanitar normalara, qidalanmaya çox tələbkardırlar. Bu şərtlərin hotellərdə yerinə yetirilməsi sual altındadır. Baxmayaraq ki, nazirlik belə layihələrə zidd çıxmır və dəstəkləyir, amma yenə də onları prioritet kimi görmür”. (hafta.az)