"Azərikimya” İstehsalat Birliyi və Azərbaycan Respublikası Dövlət Neft Şirkətinin (ARDNŞ) İnsan Resursları Departamentinin aparıcı əməkdaşları Sumqayıt Dövlət Universitetində (SDU) kimya, mühəndislik, fizika və elektroenergetika fakültələrinin sonuncu kurs tələbələri ilə görüşüblər.
SDU-nun mətbuat xidmətindən bildirilib ki, görüşdə əsas məqsədin energetika, mexanika, kimya texnologiyaları və mühəndislik üzrə sonuncu kurs tələbələri arasında işə qəbulla bağlı ilkin seçim etmək olduğu vurğulanıb.
Qeyd olunub ki, kimya, mühəndislik, fizika və elektroenergetika fakültələrinin sonuncu kurs tələbələri arasında şifahi imtahan təşkil olunacaq. İmtahandan uğurla keçənlər ARDNŞ-in İnsan Resursları Departamentində test üsulu ilə imtahan verərək, istehsalat müəssisələrində işləmək hüququ qazanacaqlar.
Sonra üç fakültənin sonuncu kurs tələbələri arasında şifahi imtahan keçirilib. Tələbələrin cavablarından razı qalan "Azərikimya” İB-nin nümayəndələri onlara qarşıdakı seçim imtahanlarında uğurlar arzulayıblar.  (azertag.az)